Сунтаар улууһугар «СУЛУСКУН ТАЛ» интерактивнай күрэскэ 11 киһи кытынна. Кыайыылааҕынан Анатолий Пахомов буолла диэн улуустааҕы култуура салаатын начаалынньыга Мария Кобельянова иһитиннэрдэ.
— Бу бырайыагы 2013 сыллаахха Альберт Горохов сүрэхтээн, билигин Юлия Филиппова салҕаан хаһыс да төгүлүн ыытыллар. Быйылгы күрэс уратыта диэн, ый устата бастакы түһүмэххэ талыллыбыт ырыаһыттар үс уһуйааччыга Мария Семеноваҕа, Радион Амоновка, Сиэн Тиитэпкэ үөрэннилэр. Онтон финалга 4 киһи инстаграм сирэйгэ куоластааһын нөҥүө тахсан кыайыылаах дьүүллүүр сүбэнэн талылынна. Үөрүүлээҕэ диэн, сыанаҕа куруутун көрөр дьоммутун кэккэ саҥа ырыаҕа холонор дьоннор кытта бааллар. Ону кытта оскуола үөрэнээччилэрэ эмиэ. Тэрээһин толору саалалаах, олус үчүгэйлик ааста. Сунтаардааҕы искусство оскуолатыгар өссө да саҥа, интэриэһинэй бырайыактары таһаара туруҥ, — диэн Мария Васильевна кэпсээтэ.
edersaas.ru