Сунтаардар спортсменнарын эҕэрдэлээтилэр

26.07.2017
Бөлөххө киир:

Бу күннэргэ Сунтаарга С.А.Зверев-Кыыл Уола аатынан Олонхо дьиэтигэр 20-с «Манчаары оонньууларыгар» кыттыбыт спортсменнары, тренердэри уонна кинилэр кыайыыларыгар күүс-көмө буолбут асчыттары, суоппардары уо.д.а дьоммутун-сэргэбитин улуус баһылыга А.В.Григорьев алгыс тылынан эҕэрдэлээтэ.

edersaas.ru


Кыайыылаахтарга итии-истиҥ эҕэрдэ тыллар этилиннилэр, харчынан бириэмийэлэр туттарылыннылар. Үөрүүлээх тэрээһиҥҥэ олохтоох федерациялар бэрэссэдээтэллэрэ, нэһилиэк баһылыктара кытыннылар. «Манчаары оонньуулара» аан бастаан 1968 сыллаахха Дьокуускай куоракка ыытыллыбыта. Онно барыта 253 спортсмен 12 хамаанда аатыттан кыттыбыта. Билигин бу тэрээһин историята күүскэ кэҥээн. Үөһээ Бүлүү улууһугар XX-с «Манчаары оонньууларыгар» 37 хамаандаттан 1700 спортсмен кыттан, 11 көрүҥҥэ күөн көрүстэ. Быйылгы күрэскэ эбии саҥа көрүҥнэр киирэн, сахалыы төрүт остуол оонньууларыгар (хабылык, хаамыска) биһиги хамаандабыт бастакы миэстэ буолбута сүргэни көтөҕөр, санааны кынаттыыр. Сунтаар улууһун дьоно-сэргэтэ быһыйдарынан, сымсаларынан, үлэни-хамнаһы кыайа туталларынан, күүстэринэн-уохтарынан, мындыр өйдөрүнэн, аламаҕай майгыларынан биллэллэр. Ол курдук, биһиги спортсменнарбыт чаҕылхай ситиһиилэрэ дойдуга аатырар, улууспут спорка көрдөрүүтэ үрдүк таһымҥа тахсар. Бүгүн Сунтаар улууһун дьоно-сэргэтэ эһигинэн киэҥ туттар, эһиги кыайыыга дьулуургут бүтүн улуус спордун сайдыытыгар сүдү кылаат буолар!

Тимур ИВАНОВ, Сунтаар, edersaas.ru   сайтка анаан.

+1
0
+1
0
+1
0
+1
0
+1
0
+1
0
+1
0