Сунтаардар Норуот маастарын күнүгэр аналлаах быыстапкаҕа 200 үлэни туруордулар
Ил Дархаммыт Ыйааҕынан, 2012 сылтан саҕалаан, биһиги өрөспүүбүлүкэбитигэр, Саха сирин норуоттарын уус-уран оҥоһуктарын, искусстволарын араҥаччылыыр, сөргүтэр уонна сайыннарар сыаллаах, Норуот маастарын күнэ бэлиэтэнэр.
Норуот маастарын күнүнэн ыытыллыбыт тэрээһиннэргэ быйыл Алтайтан, Камчаткаттан, уо.д.а эрэгийиэннэртэн итиэннэ өрөспүүбүлүкэ үгүс муннуктарыттан, ол иһигэр Сунтаартан 37 уран уус, иистэнньэҥ 200 үлэлэрэ киэҥ көрүүгэ биэс күн устата турдулар. Уустарга анаан научнай практическай кэмпириэнсийэлэр, маастар-кылаастар, дьыалабыай кэпсэтиилэр тэрилиннилэр. Эр киһи оноолоох сонун тигиигэ, кыл сэлээппэ өрүүгэ күрэс буолбутугар түөрт киһи кытынна. Сахалыы таҥастаах сэлэлии хаамыыга 30-тан тахса биир дойдулаахтарбыт кыттыыны ыллылар, ол иһигэр саха таҥаһын өрө тутааччылар, сайыннарааччылар Светлана Петрова-Уран Хатын, Николай Степанович Федоров-Уйгун Каккай, Варвара Егорова — Дыгыйа, Анжелика Кириллина уонна Сиэйэ Уола саҥа таҥаһын кэтэн хаамсыбыта олус үчүгэй.
Онтон киэһэ өрөгөй түгэҥҥэ Саргылана Меркурьева тылларыгар, Анна Тотонова матыыбыгар, Марк Андреев толоруутугар «Оһуор-мандар сэһэнэ» ырыалара норуот маастардарын күнүн өрөгөйө ырыатынан бигэргэнэн сүрэхтэннэ.
Бу күн Кутанаттан уран уус, суруйааччы, ырыаһыт Валентина Дьячковская 70 сааһын туолар үөрүүлээх түгэнин бүччүмҥэ бэлиэтээн «Сунтаар улууһун сыана бэтэрээнэ» үрдүк ааты иҥэрдибит, истиҥник эҕэрдэлээтибит.
Тэрээһин түмүгэр Күндэйэттэн уран ууска Августина Евсееваҕа «СӨ норуот уус-уран оҥоһуктарын маастара» үрдүк аат иҥэрилиннэ, Валентина Дьячковскайаҕа, Иннокентий Ивановка Бочуотунай грамота туттарылынна. Быыстапка түмүгүнэн «Төрүт иис» анал аакка Елизавета Федорова 2 миэстэ, «Дьахтар кыһыҥҥы таҥаһа» анал аакка «Сарыал» түмсүү 1 миэстэ, «Сувенирнай оҥоһуктар» анал аакка Эдуард Меркурьев 2 миэстэни, «Тимиринэн уһаныыга» Кирилл Петров 3 миэстэ, «Көмүһүнэн уһаныыга диплом, «Кылынан өрүүгэ» Валентина Иванова диплому ситистилэр. Бириистээх миэстэни ылбыт үлэлэр бу сылга Москваҕа ыытыллар Саха сирин быыстапкаларыгар кыттыыны ылыахтара, дойдуларын аатын ааттатыахтара!
Мария Кобельянова-Тускулаана, edersaas.ru