Атырдьах ыйын 29-30 күннэригэр алмаастаах түөлбэ киин куоратыгар Мииринэйгэ аан бастакытын ыытыллар Ньиэп-гаас форумугар кыттааччылары көрсөр.
edersaas.ru
Киэҥ далааһыннаах тэрээһиҥҥэ Саха сирин бырамыысылыннас сайдыбыт оройуоннарыттан саҕалаан, ыаллыы сытар улуустар кэлэн уопут атастаһаллар. Форум чэрчитинэн Саха сирин арҕаа түөлбэтин тилэри хабар бырамыысыланнаһынан дьарыктанар тэрилтэлэр бэрэстэбиитэллэрэ, общественнай түмсүүлэр, ситэриилээх былаас уорганнара кыттыылаах дьыалабыай кэпсэтиилэр буоллулар.
Тэрээһиҥҥэ Сунтаар улууһун Аҕа баһылыга Анатолий Григорьев саламталаах делегация кыттыыны ылла.
Сунтаар улууһугар бырамыысыланнас сайдар инники кэскиллээх, онно олоҕуран улууспут баһылыгын туруорсуутунан уонна СӨ бырабыыталыстыбатын өйөөһүнүнэн олохтоохтор оскуола кэннэ оробуочай исписээлинэстэргэ үөрэнэ киирэллэригэр Сунтаардааҕы технологическэй колледжпытын техническэй хайысхаҕа уларытан, ньиэп уонна гаас үөрэхтээһин хайысхалаах оҥоруу үлэтэ ыытыллыбыта. Үлэ түмүгүнэн, СӨ бырамыысыланнаска уонна геологияҕа министиэристибэтэ, СӨ бырамыысыланнай атыы-эргиэн балаатата уонна «Сахатранснефтегаз» Сунтаардааҕы технологическай колледжка ньиэп уонна гаас хайысхатыгар үөрэх таһымын үрдэтиигэ бииргэ үлэлииргэ уһун болдьохтоох сөбүлэҥ түһэристилэр.
«Сунтаар улууhа (оройуона)» муниципальнай оройуон дьаһалтатын пресс-сулууспата