Сунтаардар мэдиссиинэ, экология, тыа хаһаайыстыбатын боппуруостарын туруорустулар
Сунтаар улууһугар Саха Өрөспүүбүлүкэтин бырабыыталыстыбатын 2019 сыллааҕы үлэтин отчуота түмүктэннэ.
edersaas.ru
Кулун тутар 12 күнүгэр бырабыыталыстыба чилиэннэрэ түөрт бөлөҕүнэн арахсан үлэлээтилэр. Бастакы бөлөх Кириэстээх, Тойбохой уонна Аллыҥа, иккис бөлөх Хордоҕой, Наахара уонна Куокуну, үһүс бөлөх Кэмпэндээйи, Устье уонна Туойдаах, төрдүс бөлөх Күүкэй, Толоон уонна Хоро нэһилиэктэригэр отчуоту туруорда. Улуус олохтоохторо СӨ бырабыыталыстыбатын 2019 сыллааҕы үлэтин түмүгүн туһунан отчуоту истэн баран боппуруостары уонна этиилэри киллэрдилэр. Кэпсэтиигэ сүрүннээн доруобуйа харыстабылын, тутуу уонна тыа хаһаайыстыбатын эйгэтин таарыйдылар. Нэһилиэк аайы балыыһа боппуруоһа сытыытык турда. Ол курдук, аныгы кэмҥэ интернет ситиминэн электроннай уочарат ситэтэ суоҕун, улууска эмтэнэ киирбит киһи күн устата бырааска приемҥа киирбэккэ хаалар түбэлтэлэрэ баалларын бэлиэтээтилэр.
Улуус үрдүнэн билиҥҥи туругунан тыа сиригэр мэдиссиинэ тэриллэрэ эргэрбиттэрин уонна эдэр исписэлиистэр суохтарын, үксүлэрэ саастаах дьон үлэлииллэрин ыйдылар.
Доруобуйаларынан хааччахтаах дьоҥҥо ханнык федеральнай чэпчэтиилэринэн туһаныыны туоһуластылар. Кириэстээххэ отчуокка ыаллыы сытар нэһилиэктэртэн бэрэстэбиитэллэр ананан кэлэн кыһалҕалаах боппуруостарын туруорустулар. Ол курдук, куокунулар суукканы быһа үлэлиир стационары, хордоҕойдор хаарбах туруктаах балыыһа хаһан өрөмүөҥҥэ барарын, акушер быраас тиийбэтин, наахаралар доруобуйаларын көрдөрүнэллэригэр сылга биирдэ мэдиссиинискэй-биологическай экспедиция кэлэн барарын көрдөстүлэр.
Улууска «Россельхозбаан» салаата суох буолан, ордук тыа хаһаайыстыбатынан дьарыктанааччылар эрэйдэннилэр. Холобур, чэпчэтиилээх кирэдьиит ылааһына этиллибит баан эрэ нөҥүө сатанарын, ол туһуттан Ньурбаҕа эбэтэр Дьокуускай куоракка барар кыһалҕалар баалларын ыйдылар.
Тыа хаһаайыстыбата биһиги улууска сүрүн салаа буоларынан, атын улуустары кытта уопут атастаһа нэһилиэк баһылыктарыгар уонна туһааннаах исписэлиистэргэ сэминээр ыыталлара булгуччулааҕын эттилэр. Инникитин Бүлүү Эбэҕэ күргэ тутулуннаҕына, Мииринэй куоракка сылы эргиччи бэйэ бородууксуйатын батарыыга үлэлэһэр кэскиллээҕин бэлиэтээтилэр.
СӨ тыатын хаһаайыстыбатын үтүөлээх үлэһитэ, айылҕа харыстабылын туйгуна, «Хотугу Сулус» уордьан кавалера Кириэстээх нэһилиэгин ытык кырдьаҕаһа Михаил Коколов өрөспүүбүлүкэ үрдүнэн үлэ күүскэ ыытыллыбытын бэлиэтээн туран, отчуоту биһириибин диэн биллэрдэ.
Бэриллибит боппуруостарга министиэристибэлэр салайааччылара уонна туһааннаах тэрилтэлэр үлэһиттэрэ чопчу хоруйдары биэрдилэр, киирбит боппуруостар сорохторун салайааччылары кытта тус көрсөн, кыһалҕаларын чопчулаан, туруорсууларын суругунан киллэрэллэригэр сүбэлээтилэр. Отчуоттуур бөлөх салайааччыта Гаврил Витальевич улууспут дьонугар-сэргэтигэр бырабыыталыстыба отчуотугар көхтөөхтүк кэлэн кыттыбыттарыгар махтанан туран, киирбит этиилэр бары боротокуолланан, боппуруостары быһаарарга хамыыһыйа тэриллэн үлэлиирин, бэйэтин өттүттэн хонтуруол баар буоларын иһитиннэрдэ, өрөспүүбүлүкэбит сайдарын туһугар биир санаанан сомоҕолоһон үлэлииргэ ыҥырда.
«Сунтаар улууһа (оройуона)» муниципальнай оройуон дьаһалтатын пресс-сулууспата