«Тойбохой» сопхуос төрүттэммитэ 50 сылыгар аналлаах «Күүлэй — 2017» күрэхтэһии Тойбохойго атырдьах ыйын 26 күнүгэр буолан ааста.
edersaas ru.
Киэҥ-куоҥ Быыра сыһыытыгар харах ыларын тухары кэбиһиилээх оттор кэчигирэһэн тураллара сүргэни көтөҕөр. Түөртүү киһилээх биэс хамаанда ох курдук оҥостон, кустук курдук куоһанан кэлбиттэр. Балаһыанньа быһыытынан, хамаанда ахсын аҕыстыы суотай сир ананар, ону кинилэр илии хотуурунан охсон, бугуллаан биэрэллэр. Күүлэй күнүс икки чаастан саҕаланна. Хамаанда бэриллээтин кытары бэлэм турбут дьоннор оту охсон куһуйбутунан, сорохторо ону тута муспутунан бардылар. Төһө да уу ото буоллар, сэтиэнэхтээх, ону ааһан олус хойуу итиэннэ сирэ инчэҕэй буолан, үлэлииргэ ыарахаттардаах буолла. Ол эрээри, үлэлии үөрэммит дьон онтон иҥнибэтилэр.
Сирдэрин бастакынан Тойбохой “Күүлэй” хамаандата (Семен, Василий, Иван Гуляевтар уонна Михаил Саввинов) бүтэрэн, кыайыы өрөгөйүн биллилэр. Улуус дьаһалтата туруорбут тыраахтарга холбонор от охсор тэрилин туттулар итиэннэ ”Күүлэй” куубагын өрө көтөхтүлэр. Дьаархан нэһилиэгин «Үчүгэй үрэх» хамаандата кинилэртэн бэрт кыранан хаалла. Спортинструктор Павел Кырелов уола Уйусханы, уһуйаан үлэһитэ Альберт Кузьмин уола Иваны кытары хамаанда тэринэн кэлбиттэр. Иккис миэстэни ылан, Тойбохой дьаһалтата туруорбут 40 тыһ. солк. харчынан бирииһин ыллылар. Улуус кииниттэн тиийэн кыттыбыт «Тимир» хамаанда үһүс бириистээх миэстэҕэ тиксэн, тыа хаһаайыстыбатын управлениета олохтообут 400 лиитэрэ уматыкка сертификатын туттулар. Илимниир нэһилиэгин хамаандата үлэтин төрдүһүнэн түмүктээтэ. Бу хамаандаҕа сүүрбэлэрин саҥа ааспыт уолаттар түмсүбүттэр, эдэр дьон маннык күүлэйдэргэ кытталлара ыччаты илиинэн оттооһуҥҥа көҕүлүүргэ холобур эрэ буолар. Бэһис миэстэни «Тоҕой Сэлэ» хамаанда (Тойбохой) ылла.
Күүлэй саамай аҕа саастаах кыттааччыта Иван Гуляев «Хочо» МУП (сал. Валерий Илларионов) туруорбут биэс киилэ арыытын тутан, сүргэтэ көтөҕүлүннэ. Маннык биһирэбил бирииһи күүлэй соҕотох кэрэ кыттааччыта А.Тимофеева тутта. Күрэхтэһии кыттааччыларын, ыалдьыттарын Тойбохой олохтоох дьаһалтатын үлэһиттэрэ сыалаах эттээх миининэн, сибиэһэй хортуоппуйдаах ыһаарынан тото-хана аһаттылар.
Күүлэй кэнниттэн Быыра киэҥ сыһыытыгар тыһыынчанан бугул үөрэ-көтө олорон хаалла, улуус оттооһуҥҥа былаанын туолуутугар сүдү кылаат киирдэ.
Павел Кырелов, Сунтаар. “Саха сирэ” хаһыат, edersaas ru. сайтка анаан
