Бу ый саҥата Индияҕа Үөрэнээччилэр Бүттүүн аан дойдутааҕы спортивнай оонньуулара ыытыллыбыта. Күрэхтэһиигэ олимпийскай эрэллэр училищеларын уонна Сунтаардааҕы оҕо спортивнай оскуолатын иитиллээччилэрэ ситиһиилээхтик кыттан кэлбиттэрэ.
От ыйын 18 күнүгэр Сунтаар улууһун баһылыга А.В. Григорьев тустуу күрэҕэр ситиһиилээхтик кыттан кэлбит биир дойдулаахтарын, кэскиллээх спортсмены Харысхал Григорьевы кытары көрүстэ. Анатолий Васильевич көрсүһүүгэ Харысхал төрөппүттэригэр Лилия Алексеевнаҕа, Георгий Спиридоновичка, тренерэ Николай Романовичка махтал, эҕэрдэ тылларын эттэ. Бу туһунан «Эдэр саас» сайтка улуус баһылыгын көмөлөһөөччүтэ Тимур Иванов иһитиннэрдэ.
– Сунтаар дьоно быһыйдарынан, сымсаларынан, үлэни-хамнаһы кыайа тутар күүстэринэн-уохтарынан, мындыр өйдөрүнэн, аламаҕай майгыларынан биллэллэр. Ол курдук, биһиги спортсменнарбыт чаҕылхай ситиһиилэрэ аан дойдуга аатырар, улууспут спорка көрдөрүүтэ үрдүк таһымҥа турар. Бүгүн биһиги Сунтаарбыт улууһун дьоно-сэргэтэ эйигинэн киэҥ туттар, эн кыайыыҥ бүтүн улуус спордун, көҥүл тустуутун сайдыытыгар сүдү кылаат буолар! Инникитин даҕаны биир дойдулаахтарыҥ – Александр Иванов, Альберт Захаров, Николай Яковлев, Алквиад Иванов, Петр Попов, Семен Зедгенидзев, Лука Иванов о.д.а курдук төрөөбүт улууһуҥ, өрөспүүбүлүкэҥ чиэһин аар-саарга аатырда сырыт, – диэн улуус баһылыга алгыс тылларын көрсүһүү кэмигэр эттэ.
Сунтаардар кэскиллээх спортсменнарын чиэстээн, сыаналаах бирииһинэн наҕараадалаатылар.
Анивера Акимова, «Саха сирэ» хаһыат, https://edersaas.ru/