Кулун тутар 20-21 күннэригэр Сунтаарга Бүлүү эҥээр улуустар экологтарын спартакиадата буолла. Санатан эттэххэ, бу тэрээһин 12-с төгүлүн ыытылынна.
Быйылгы спартакиаданы Сунтаар улууһун экологияҕа иниспиэксийэтэ тэрийэн, иилээн-саҕалаан ыытта. Иниспиэксийэ салайааччыта Сергей Николаев экологтарга анаан ыытыллар тэрээһин үгэс курдук сыллата салҕанан иһэрэ, улахан бырааһынньык курдук буолара сүргэни көтөҕөрүн бэлтэтээтэ.
—-Аан бастаан, бу тэрээһин Бүлүү эҥээр улуустар экологтарын икки ардыгар ыытыллар куоталаһыы этэ. Сыл ахсын бэйэбит икки ардыбытыгар спортивнай күрэхтэһиилэри тэрийэрбит. Спартакиадабыт сайдан, тупсан, далааһыннанан барбыта. Кыттааччыта элбии турар. Быйылгы тэрээһиҥҥэ Ленскэйтэн, Мирнэйтэн, Саха сирин экологияҕа министиэристибэтиттэн, биологическай ресурсалар уонна ураты харыстанар сирдэр Дирекцияларыттан хамаандалары тэринэн күөн көрсө кэлбиттэрэ биһигини барыбытын олус үөртэ, — диэн этэр.
Маны сэргэ, Сергей Николаев олус күүстээх хамаандалар күрэхтэспиттэрин бэлиэтээтэ. Спортсменнар волейболлаабыттар, мас тардыспыттар, сыал ыппыттар, канаат тардыспыттар, эстафетаҕа сүүрбүттэр.
Икки күннээх илин-кэлин түсүһүүлээх кытаанах күрэхтэһии кэнниттэн, Сунтаар хамаандата инники күөҥҥэ чорбойон таҕыста онон бастакы миэстэни ылан үөрүү-көтүү өрөгөйө буолла. Кинилэри тилэх үктэһэн, Бүлүү хамаандата иккистээтэ. Үһүс бочуоттаах миэстэҕэ Дьокуускайтан анаан күрэхтэһэ тиийбит биологическай ресурсалар уонна ураты харыстанар сирдэр Дирекцияларын спортсменнара тахсан кэллиэгэлэрин эҕэрдэлэрин туттулар.
СӨ экологияҕа министиэристибэтин пресс-сулууспата