Маны аах Суолталаах Тыа хаһаайыстыбата Уопсастыба

Сунтаардар Дьоруой ыанньыксыкка 5 мөл. солк. бэлэхтээтилэр

Самаан сайыны уруйдуур ыһыахтарбыт дьэ саҕаланнылар. Бэҕэһээ, бэс ыйын 18 күнүгэр, буолбут Сунтаар ыһыаҕар  улуус баһылыга Анатолий Григорьев Үлэ Дьоруойугар, өрөспүүбүлүкэ үрдүнэн биир тарбахха баттанар ыанньыксыт  Владимир Африканович Михайловка  олохтоохтор ааттарыттан эҕэрдэ тылы этэн туран, 5 мөл. солк. сэртипикээти үөрүүлээх быһыы-майгы ортотугар туттарда. 

Санатар буоллахха, Арассыыйа күнүгэр, бэс ыйын 12 күнүгэр, биир дойдулаахпыт Владимир Африканович  Владимир Путин илиититтэн РФ Үлэ Дьоруойа кыһыл көмүс сулуһу туппута.

Дьоруой ыанньыксыт Владимир Михайлов төлөпүөнүгэр эрийэн билсибиппитигэр, «Бэҕэһээ улууһум ыһыаҕар сырыттым. Сунтаар баһылыга Анатолий Григорьев элбэх суумалаах сэртипикээти биэрэн олус диэн үөртэ, долгутта. Түгэнинэн туһанан, улууһум олохтоохторугар ис-сүрэхпиттэн  махтанабын! Самаан сайын кэлбитин уруйдуур-айхаллыыр ыһыахтар саҕаламмыттарынан Саха сирин ытык-мааны олохтоохторун  эҕэрдэлиибин! Бу аан дойду үрдүнэн буола турар уустук балаһыанньа кэмигэр, бары биир санаанан салайтаран сомоҕолоһуоҕуҥ. РФ Бэрэсидьиэнэ Владимир Путин ыытар бэлиитикэтин бары өйүөҕүҥ!

Дьэ бу өтөхпөр кэлэн олоробун. Билигин 50 ынаҕы ыыбыт, күҥҥэ туоннанан үүтү туттарабыт. Солбуйааччыларым суох кэммэр ынахтары бэркэ диэн көрбүттэр, ыабыттар. Биэрбит үптэринэн хаһаайыстыбабытын хаҥатыахпыт,  сайылыкпытыгар саҥа дьиэ туттуохпут, тиэхиньикэ атыылаһыахпыт», — диэн  санаатын үллэһиннэ.

 

0
0
Telegram @edersaas20