Хомсомуол үбүлүөйдээх күнүн көрсө Сунтаар улууһугар субуотунньук биллэриллибитэ.
edersaas.ru
СУНТААРГА 500 киһи тахсан эргэ уопсай дьиэлэри көтүрдүлэр, нэһилиэги ыраастаатылар, кырдьаҕас ыалларга, бэтэрээннэргэ көмөлөстүлэр. Бу кэмҥэ култуура салалтата агитбиригээдэ тэрийэн үлэ бара турар сирдэригэр ырыа-хоһоон бэлэх оҥордо.
КИРИЭСТЭЭХХЭ 90-ча киһи тахсан саҥа тутулла турар арочнай спортивнай сааланы ханаппаакылаатылар.
СИЭЙЭҔЭ араас хабааннаах үлэ барда. Дьаһалта дьиэтин иннигэр миитиннээтилэр, саһаан туруоран нэһилиэк дьонугар көмө буоллулар.
ТОЙБОХОЙГО «Хомсомуол — айар тутар суолдьутум» диэн күрэс буолан ааста. Бу күрэскэ араас сылларга Хомсомуол кэмитиэтин сэкирэтээрдэринэн үлэлээбит салайааччылар 5 киһилээх хамаанда тэринэн кытыннылар. Оттон библиотекаҕа 3 кылаас үөрэнээччилэригэр «Молодая гвардия» кинигэ туһунан билиһиннэрдилэр.
БҮЛҮҮЧЭЭҤҤЭ «Эн хомсомуол — мин дьолум» диэн көрсүһүү буолла. Урукку кэми санаатылар, ырыа-тойук аргыстаах дьоро күн олохтонно.
МААР КҮӨЛГЭ оскуола кэлэктиибин көҕүлээһининэн субуотунньук тэрилиннэ. Пилорама эргэ мастарын саһаан оҥорон кыаммат дьоҥҥо тиэйдилэр. Кулуупка Хомсомуол күнэ тэрилиннэ. Көлүөнэнэн арахсан ыллаатылар, үҥкүүлээтилэр, муода көрдөрдүлэр.
ДЬААРХАҤҤА «Одун» КК-гэр араас көлүөнэ комсомолецтара көрүстүлэр. Баян доҕуһуолунан парадтаан тиийэн субуотунньуктаатылар. Ол кэннэ кулуупка тиийэн баян доҕуһуолунан ыллаатылар. Итии чэй иһэ-иһэ, фотослайдынан биир-биир туран кэпсээтилэр. Араас викторина ыытылынна, ирэ-хоро кэпсэттилэр, хаартыскаҕа түстүлэр.
Мария Кобельянова-Тускулаана, Сунтаар