Чугастааҕы сылларга Сунтаар сэлиэнньэтигэр 100 ыал олороругар аналлаах «100 лет ЯАССР» диэн ааттаах саҥа микро-оройуон тутаары былаанныыллар. Бу күннэргэ улуус дьаһалтата СӨ Тыа хаһаайыстыбатын министиэристибэтин кытары бииргэ үлэлээһиҥҥэ сөбүлэһии түһэристилэр.
Анивера Акимова, «Саха сирэ» хаһыат, https://edersaas.ru/
“Тыа сирин 2014-2017 сылларга уонна 2020 сылга диэри кэмҥэ бигэтик сайыннарыы” тус сыаллаах федеральнай бырагыраамаҕа биһиги өрөспүүбүлүкэбит сыл аайы көхтөөхтүк кыттан, аҕыйаҕа суох үбү-харчыны бүддьүөттэн бэриһиннэрэр. Холобур, Амма улууһун Абаҕатыгар модульнай хочуолунайдаах микро-оройуон тутуллуохтаах. Бырайыак иккис түһүмэҕэр оҕо саада уонна оскуола тутуллара былааннанар.
Сунтаарга «100 лет ЯАССР» диэн микро-оройуон тутуутугар федеральнай бүддьүөттэн 47,7 мөл. солк. субсидия харчыта көрүллүөхтээх. Онон 100 ыал олороругар анаан суолун-ииһин, уу, уот ситимнэрин тардыы үлэлэрэ ыытыллыахтаах. «Бу үлэ икки сылынан түмүктэниэ. Дьоммут олохторун оҥостоллоругар олук уурулунна», – диэн Сунтаар улууһун баһылыгын көмөлөһөөччүтэ Тимур Иванов иһитиннэрдэ.
Тыа сиригэр олох усулуобуйата тупсан бардаҕына, сыыйа эдэрдэр олохсуйан барыахтара. Ама, ханнык киһи сылаас, толору хааччыллыылаах дьиэҕэ, көнө уулуссалардаах бөһүөлэктэргэ олоруон тоҕо баҕарбат буолуой?
Анивера Акимова, «Саха сирэ» хаһыат, https://edersaas.ru/