Ыам ыйын 18 күнүгэр Сунтаарга улуустааҕы суһал штаб хамыыһыйата, ол иһигэр Сунтаар улууһун Аҕа баһылыга Анатолий Григорьев, тэрилтэ тутаах салайааччылара “РНГ” ХЭТ судаарыстыбаннай уорганнары кытары сибээстэһиигэ менеджерэ Дмитрий Пискунову уонна «ВостСибСпецМонтаж» хампаанньа дириэктэрин бастакы солбуйааччыта Виктор Денисюгу кытта көрсөн дьаҥ ыарыытын утары охсуһар инники ыытыллыахтаах үлэлэри торумнаатылар.
edersaas.ru
Сүбэ мунньахха обсерваторга киирбит тэрилтэ үлэһиттэрин көрүүтүн-истиитин хааччыйааһыныгар уонна үбүлээһинигэр тэрилтэ бэйэтэ уйунарын курдук кэпсэтии барда. Ыам ыйын 19 күнүгэр баахтабай бөһүөлэккэ дезинфекция үлэтэ ыытыллыахтаах. Ол кэннэ уопсай балаһыанньа тубустаҕына, СӨ үрдүнэн кииннэмит суһал штаб быһаарыытынан баахтабай бөһүөлэккэ карантин режимын көтүрүү буолуо.
Инникитин хампаанньа былааннаммыт үлэтин ситэрэргэ олохтоох нэһилиэнньэттэн үлэһиттэри үлэҕэ ылыаҕа.
Тэрилтэ бэрэстэбиитэллэрэ улууска турбут уустук балаһыанньаны өйдөөн, дьаҥ ыарыытын туоратарга суһал штаб чилиэттэрин кытта бииргэ үлэлиир уопсай түмүккэ кэллилэр.
Салгыы куйаар ситиминэн СӨ үрдүнэн кииннэммит суһал штаб салалтатын кытта улуустар коронавирус инфекциятын утары сүбэ мунньах ыыттылар. Кэпсэтиигэ СӨ Бырабыыталыстыбатын бэрэссэдээтэлин солбуйааччы Ольга Балабкина сүрүн болҕомтону обсерватор үлэтин боппуруоһугар туһаайда. Онно бэрээдэги хонтуруоллуур уорганнар өттүлэриттэн кэтээн көрүү үлэтэ күүһүрдүллүөхтээҕин ыйда.
Сунтаардааҕы суһал штаб пресс-сулууспата