Бэс ыйын 2 күнүгэр Элгээйи кэрэ миэстэтигэр Угут Күөлгэ «Сунтаар уус алданнара» дьиэ-кэргэттэринээн дойду ахтылҕанын таһааран 70-ча буолан тоҕуоруһа муһуннулар. Бу түмсүү төрүттэммитэ төрдүс сыла.
edersaas.ru
Урукку өттүгэр Сунтаарынан, Тойбохойунан көрсүбүт буоллахтарына, быйыл Элгээйи сөрүүн салгынынан сайа көрүстэ. Б.Н.Андреев аатынан Айылҕа музейыгар (дириэктэр Анна Иванова) экскурсиянан саҕаланна. Экскурсовод Надежда Попова сиһилии кэпсээн, кэлбит ыалдьыттар кэрэхсии көрдүлэр, элбэх уратыны биллилэр. Салгыы Алгыстаах Угут Күөлгэ нэһилиэктэр парадтаан, эҕэрдэ кэнсиэри Анастасия Александрова иилээн-саҕалаан истиҥник ыытта. Иннокентий Алексеев Элгээйиттэн, Варвара, Валерий Ивановтар Раиса Уарова Тойбохойтон, Константин Рожин хомуһунан, Сергей Сивцев, Юлия Филиппова Сунтаартан нарын куоластаах ырыаларын иһиттибит, Элгээйилэр имигэс үнкүүлэринэн, көрдөөх сыанкаларынан, хомоҕой хоһооннорунан киэргэттилэр. Тэрийээччилэр, Элгээйи куустатын Уус Алданнара Людмила Ким салайыытынан минньигэс ис миининэн, тотоойу шашлыгынан, кыынньар кымыһынан, эгэлгэ ас арааһынан, Валентина Винокурова оҥорбут туордунан күндүлэһэн ирэ-хоро күлэ-үөрэ сэһэргэстилэр. Сүүрүү, мас тардыһыыта, мээчик хабыыта эдэриттэн-эмэнигэр тиийэ бука бары кыттан үөрүүлэрэ үксээтэ. Ону тэҥэ «Бастыҥ Кэрэ аҥаар» уонна «Эр бэрдэ» күрэхтэр тыҥааһыннаахтык ыытылыннылар. Олохтоох күтүөттэр-кийииттэр көмөлөһөн-өйөөн, барытыгар күүс-көмө буолан тэрийсибиттэригэр махталлара муҥура суох. Түмүгэр түмсүү былааҕын Захар Босиков (Элгээйи) Евдокия Максимоваҕа (Сунтаар) туттарда. Онон эһиилги үбүлүөйдээх тэрээһин улуус киинигэр Сунтаарга буоларын дойду сир ахтылгҕанын таһаара долгуйа күүтэллэр!
Мария Кобельянова-Тускулаана, edersaas.ru сайтка анаан