Сунтаар улууһугар Экология, Доруобуйа сылынан уонна Оҕолор доруобуйаларын нэдиэлэтинэн сибээстээн, бүгүн Олоҥхо дьиэтигэр оҕолорго аналлаах улахан ааксыйа ыытылынна.
edersaas.ru
Ол эбэтэр, араас төрүөтүнэн поликлиникаҕа доруобуйаларын көрдөрө кэлбэт 1,5-17 саастаах оҕолорго “Сказочное здоровое царство” аһаҕас аан күннэрэ буолла. Балыыһа исписэлиистэрэ: окулист Елизавета Сергеева, невролог Мария Данилова, лор Егор Алексеев, дерматолог Сардаана Федорова, хирург Анна Атласова, УЗИ бырааһа Наталья Никитина аахсыйа кырачаан кыттыылаахтарын доруобуйаларын бэрэбиэркэлээтилэр.
Оҕолор сылайбаттарын, аралдьыйбаттарын курдук, поликлиника иһинэн үлэлиир оҕо отделениетын үлэһиттэрэ “Буратино” театрализованнай туруоруу бэлэмнээбиттэр. Кырачааннарга гематогеннары, фруктаттан оҥоһуллубут канапелары, муорус уо.д.а. астары түҥэттилэр, физиопроцедуралары ыллылар. Педиатр-быраастар Е.А.Карпова сөпкө аһааһын, М.А.Игнатьева аллергия, М.Р.Яковлева ааһан-араҕан биэрбэт бронхит, А.А.Михайлова тонзиллит, А.О.Федорова тус гигиена, Л.К.Яковлева күннээҕи режим тустарынан кэпсээтилэр.
Онон, бу күн кырачааннар уонна обургу оҕолор тустаах исписэлиистэртэн сүбэ-ама ылан, бэйэлэрэ да, төрөппүттэрэ да сүргэлэрэ көтөҕүллэн тарҕастылар. Тэрээһин кыттыылаахтара улуус баһылыга Анатолий Григорьевка, Светлана Иванова кылаабынай быраастаах улуустааҕы Киин балыыһа кэлэктиибигэр махталларын эттилэр.
Надежда ЕГОРОВА, “Саха сирэ”, edersaas.ru