Сунтаар олохтооҕо космонавтикаҕа сыһыаннаах 1000-тан тахса испиискэ хаатын муспут
Сунтаар улууһуттан төрүттээх Оксана Гавриловна Иннокентьева Космонавтикаҕа сыһыаннаах испиискэ хааларын мунньар дьарыктаах эбит. Ол туһунан кэллиэксийэһит Оксана Гавриловнаттан кэпсииригэр көрдөстүбүт:
— 1962 сылтан саҕалаан 1970-с сылларга диэри мунньубутум. Испиискэ ойуутун кырыйан ылан, альбомҥа сыһыаран саҕалаабытым. Уопсайа кэллиэксийэбэр 1050-чэ испиискэ ойуута баар. Барыта космонавтика тиэмэтигэр ойууламмыт уруһуйдар: Циолковскай, бастакы космонавтар, аракыаталар уо.д.а.
Мунньубут кэллиэксийэм кэнники оҕолорбор, сиэннэрбэр хаалан, көлүөнэттэн көлүөнэҕэ бэриллэр кэм сыаналаах бэлэх буолуоҕа. Космонавтикаҕа сыһыаннаах испиискэ ойууларын мунньарым таһынан, кыра кээмэйдээх халандаардары мунньубутум, ону кыыспар бэлэхтээбитим.
Бэйэм миэдик идэлээхпин, сааһым тухары 50 сыл Дьокуускайдааҕы 3-с №-дээх поликлиникаҕа сиэстэрэнэн үлэлээн баран былырыын уурайбытым.