Тохсунньу 26 күнүгэр хотугу дойдуга соҕотох Бриллиантовай циркэ киэҥ уораҕайыгар Олоҥхо дойдутун сулуһа умайда. Бу күн Сунтаартан төрүттээх дьон, куорат олохтоохторо уонна ыалдьыттара “Сунтаар – олоҥхо дойдута” аат туоһу сурукка киирбитин, бэчээтинэн бигэргэммитин уруйдаан, Саҥа дьыллааҕы дьоро киэһэҕэ муһуннулар.
edersaas
Сунтаардар биһиктэнэн улааппыт, суон сураҕырбыт добун оһуохайдарыгар күнүс 4 чаастан эдэрдиин-эмэнниин тоҕо анньан кэллилэр. Сунтаар Түбэйиттэн төрүттээх, Туймаада ыһыаҕын Дархан этээччитэ Михаил Евсеев—Кураһаай Мэхээлэ оһуохайы оройуттан тутан, бар дьонун астыннарыан астыннарда. “Оһуохай” түмсүү көхтөөх чилиэнэ, оһуохайдьыт Марта Николаева сатабылынан оһуохай икки чаас устата быстыбакка дуораһыйда, бииртэн биир этээччилэргэ олорсон, киэҥ түһүлгэ олохтонно. Оһуохайга кыттыспыт дьон Дархан этээччи Егор Осиповка, үтүөлээх этээччи Каджана Евсееваҕа, Хаандыгаттан анаан-минээн кэлэн оһуохай тэрээһинигэр көмөлөспүт Екатерина Скрыбыкинаҕа махталларын эттилэр.
Тохсунньу томороон тымныытыгар оһуохайы көҕүлүттэн тутан күүстэригэр күүс эбиммит, харахтыын сырдаабыт ыалдьыттар салҕыы “Олоҥхо дойдутун сулуһа – сунтаардар түмсүүбүт суһума” үөрүүлээх тэрээһини умсугуйа көрөөрү циркэ аренатыгар киирдилэр. Дьоро киэһэ бастакы түһүмэҕэр 2018 сыл бастыҥ суруналыыстарын, суруйааччыларын, наукаҕа, искусствоҕа, предпринимательствоҕа уо.д.а. эйгэлэргэ кэккэ ситиһиилэрдээх салайааччылары аренаҕа ыҥыран чиэстээтилэр. Ситэриилээх былааска үлэлиир биир дойдулаахтар туйгуннук үөрэнэр устудьуоннарга бэйэлэрин истипиэндьийэлэрин туттардылар. Улуус баһылыга Анатолий Григорьев саха норуодунай худуоһунньуга Тимофей Степановка “Сунтаар улууһун бочуоттаах олохтооҕо” аат иҥэриллибит туоһутун кыыһа Айталина Степановаҕа туттарда, талааннаах худуоһунньугу ахтан-санаан ааста. Федерация Сэбиэтин кэмитиэтин бэрэссэдээтэлин солбуйааччы Александр Акимов, СӨ Ил Түмэн дьокутааттара Семен Березин, Андрей Николаев, СӨ экологияҕа миниистирэ Сахамин Афанасьев, баайга-дуолга сыһыаннаһыы миниистирин солбуйааччы Михаил Никифоров, инвестиционнай сайдыы уонна предпринимательство миниистирин солбуйааччы Максим Прокопьев, үөрэх миниистирин солбуйааччы Владимир Тихонов, Сунтаар түмсүүтүн салайааччытын солбуйааччы Владимир Лазарев уо.д.а. үүммүт сылынан биир дойдулаахтарын эҕэрдэлээтилэр. «Арктик-Капитал» хампаанньалар бөлөхтөрүн салайааччы, улуус түмсүүтүн салайааччы Матвей Евсеев өрөспүүбүлүкэ таһыттан бар дьонугар ыыппыт эҕэрдэтин ытыс тыаһынан уруйдаатылар.
Дьоро киэһэҕэ олоҥхо дьоруойдара аныгы кэмҥэ түбэспиттэрин, кинилэр мүччүргэннээх сырыыларын толкуйдаан көрдөрбүттэрэ сэргэхситтэ. Ол иһигэр, Бүлүү Эбэҕэ ааҥнаабыт алдьархайы, кини инники дьылҕатын, төрөөбүт дойду ахтылҕанын, өбүгэлэр ситимнэрин уо.д.а. хас биирдии киһини долгутар кыһалҕалар тыктарыллан аастылар. Дьоруойдары артыыстар Дмитрий Михайлов, Айаал Аммосов, Евдокия Семенова, Тамара Попова, Изабелла Егорова, Анатолий Амбросьев, Гея Буртахова уо.д.а. оонньоотулар.
Ону сэргэ, биллэн турар, өрөспүүбүлүкэ киэн туттар, Сунтаартан төрүттээх ырыаһыттар биир дойдулаахтарыгар ылбаҕай ырыаларын бэлэхтээтилэр. Сунтаар тэрилтэлэрин салайааччыларын «Олоҥхо оһуора» бөлөҕүн тойугун истэн, ахтылҕаннаах дойду салгына илгийбиккэ дылы буолла. Дьоро киэһэ сценарийын Наталия Михалева-Сайа, режиссуратын Дора Баланова, Саймон Сергеев кыайа-хото туттулар, Н.Михалева уонна Михаил Семенов иилээн-саҕалаан, бэрт сэргэхтик ыыттылар.
Ити курдук, Сунтаар улууһун түмсүүтэ сылга иккитэ ыытар киэҥ хабааннаах тэрээһиннэриттэн биирдэстэрэ – кыһыҥҥы көрсүһүү, мэлдьи буоларын курдук, үрдүк таһымнаахтык ааста. Сунтаардары сомоҕолуур уопсастыбаннай тэрилтэ чилиэннэрэ куоракка уонна да атын улуустарга олорор биир дойдулаахтарын биир түһүлгэҕэ түмэн, умнуллубат киэһэни бэлэхтээн кэпсээнтэн кэпсээҥҥэ сылдьаллара, атыттар үтүө холобур оҥостоллоро саарбахтаммат.
Бу күн улуус талааннаахтарын быыстапкалара, кинигэ атыыта тэрилиннэ. Кэнсиэр кэнниттэн биир дойдулаахтар “Күөх уот” тэрээһиҥҥэ, үҥкүү түһүлгэтигэр көрүстүлэр, ахтылҕаннарын таһаардылар, үтүө сонуннарын үллэһиннилэр, бэйэ бэйэлэригэр алгыс тыллары анаатылар.
Надежда ЕГОРОВА, “Саха сирэ” edersaas.ru
Ааптар уонна Владислав КОРОТОВ түһэриилэрэ