Сунтаарга муус устар 21 күнүгэр улуус Аҕа баһылыга Анатолий Григорьев, тутуу комплексын управлениетын салайааччыта Иван Егоров, исписэлиистэр Виктор Ефремов уонна Уйгулаана Павлова Сиэйэ, Кутана, Элгээйи уонна Күндэйэ нэһилиэктэригэр тутуу хаамыытын, хаачыстыбатын көрдүлэр.
Сиэйэҕэ нэһилиэк баһылыга Алексей Обоюков 50 миэстэлээх «Сарыал» оҕо саадыгар сырытыннарда. Онно былырыын сарайын уларытыытыгар үлэ ыытыллыбыт буоллаҕына, быйыл дьиэ ис өттүгэр истиэнэлэрин, муостатын уонна благоустройствотын өрөмүөннүүрү былааннаатылар. Салгыы саҥа тутулла турар культурнай-спортивнай комплекс эбийиэгин көрдүлэр-иһиттилэр. Үлэни «Туйгун» ХЭТ тэрилтэ ыытар, болдьоммут былаанынан, сотору иһигэр бастакы уонна иккис этээс муосталара, тас өттүгэр түннүк, аан олордуута уонна үктэл уурааһыныгар киириэхтэрэ.
Кутана нэһилиэгэр, «Хаарбах туруктаах дьиэттэн дьону көһөрүү» бырагырааматынан нэһилиэк киинигэр 12 кыбартыыралаах толору хааччыллыылаах таас дьиэ тутуутун нэһилиэк баһылыга Николай Давыдов сырдатта. Манна Владислав Крыжановскай салайааччылаах“Айан-Суол” ХЭТ үлэни ыытар, билигин эбийиэккэ Андрей Варламов прорабтаах уонтан тахса үлэһит бастакы этээскэ үлэлииллэр, алларааҥҥы этээс сабыыта бүппүт. Дьиэ бу сыл бүтүүтэ үлэҕэ киириэхтээх.
Элгээйи нэһилиэгэр, «ППМИ» бырагырааматынан «Туойдаах Алаас» түмэлин дьиэтин өрөмүөнүгэр сөбүлэҥ түһэрсиитэ ситтэҕинэ үлэ ыытарга аукцион оҥоһуллуохтаах. Нэһилиэк баһылыга Гаврил Яковлев иһитиннэрбитинэн, дьон олорор усулуобуйата тупсарыгар нэһилиэк бэйэтин бүддьүөтүттэн уон ыалга көмө көрүллүбүт.
Күндэйэҕэ нэһилиэк баһылыга Иван Константинов 50 миэстэлээх оҕо уһуйаанын территориятыгар сыбаайа түспүтүн көрдөрдө. Эбийиэккэ салгыы үлэ ыытарга докумуона ситтэҕинэ аукциоҥҥа таһаарыахтара.
«Сунтаар улууhа (оройуона)» муниципальнай оройуон дьаһалтатын пресс – сулууспата.