Сунтаар нэһилиэгин баһылыгын Кубогар ыытыллар спартакиада быйыл Саха АССР төрүттэммитэ 100 сылыгар ананна диэн Сунтаартан Светлана Егорова иһитиннэрдэ.
Ол курдук, олунньу 25 күнүгэр, дуобат күрэҕинэн саҕаланна. Күрэх Аҕа дойду сэриитин кыттыылааҕа, Кыһыл Сулус орден кавалера, «За отвагу», «За оборону Ленинграда», «За оборону Сталинграда», «За Победу над Германией” мэтээллэр хаһаайыннара Мелетий Васильев сырдык кэриэһигэр ананна. Тэрээһин үөрүүлээх чааһа Сунтаар нэһилиэгин баһылыга Эдуард Филиппов тыл этиитинэн арылынна, ол кэннэ Мелетий Аввакумович төрөппүт кыыһа Любовь Мелетьевна аҕатын туһунан ахтан-санаан ааста, эйэлээх олоххо олорорбутун ситиспит хорсун буойуттарбыт, туруу үлэһит дьоннорбут сырдык ааттарын үйэтитэр сыаллаах тэрээһиннэр ыытыллалларын махтанан туран бэлиэтээтэ.
Уопсайа күрэххэ 12 хамаанда кытынна. Хамаандаҕа икки дьахтар, икки эр киһи киирэр. Күрэх 11 эргиирин устата, круговой систиэмэнэн ыытылынна. Күүстээх, уһун эрийсиилээх киирсии түмүгэр кыайыылааҕынан таҕыстылар:
3 миэстэ – “Луч” хамаанда (СЦДТ, ЖКС, Пенсионнай управление, Үөрэҕирии управлениета)
2 миэстэ – Сунтаардааҕы инбэлииттэр обществоларын холбоһуктаах хамаандата
1 миэстэ – Сунтаардааҕы киин балыыһа холбоһуктаах хамаандата.
Миэстэлэспит хамаандалар грамотанан уонна мэтээлинэн наҕараадаланнылар, ону таһынан бастаабыт хамаанда Мелетий Аввакумович оҕолоро, сиэннэрэ, хос сиэннэрэ туруорбут анал бирииһин ылан, илии тутуурдаах тарҕастылар.
edersaas.ru