Култуура

«Сунтаар миигин ыҥырар-2022»

Сунтаарга саха норуодунай  бэйиэтэ Леонид Андреевич Попов аатынан «Ньургуһун» литература түмсүүтэ тэриллибитэ 50 сылыгар аналлаах улуустааҕы  ырыа-хоһоон түһүлгэтэ алтыс төгүлүн ыытыллар. 

Балаҕан ыйын 1-2 күннэригэр Сунтаар сэлиэнньэтигэр ыытыллар түһүлгэ бырагыраамата бигэргэннэ.

Балаҕан ыйын 1 күнүгэр:

10.00-11.00 – нэһилиэктэринэн “Билии күнүн” тэрээһиннэригэр “Ньургуһун” литература түмсүүтүн чилиэннэрин, ыҥырыылаах ыалдьыттарын кыттыылара.

14.00-16.00 – С.А.Сибиэрэп-Кыыл Уола аатынан улуустааҕы Норуот айымньытын киинигэр:

-“Ньургуһун” литературнай түмсүү – оҕолорго” түһүлгэ;

-“Ньургуһун” литературнай түмсүү суруйааччыларын, ааптардарын айымньыларын дорҕоонноохтук, уус-ураннык ааҕыы күрэҕэ;

-“Ньургуһун” литературнай түмсүү оҕолорго аналлаах айымньыларын бириэмэҕэ ааҕыы;

-“Саас илдьитэ —  нарын ньургуһун”  уруһуй күрэҕэ;

-“Ньургуһун” холбоһук туһунан төһө билэҕин?”   таайбараҥ.

 

“Ньургуһуннар, ньургуһуннар – хомоҕой хоһоонноох, кэрэ кэпсээннээх ньургуһуннар!”  суруйааччылар, ааптардар түһүлгэлэрэ;

“Ньургуһун 50 сыла” — кинигэ быыстапката.

17.00 — С.А.Сибиэрэп-Кыыл Уолун аатынанлуустааҕы Норуот айымньытын киинигэр:

17.00 – “Ньургуһуннар – айар куттар”  литературнай түмсүү кыттыылаахтарын айар талааннарын быыстапкатын үөрүүлээхтик арыйыы;

18.00 — “Ньургуһунтан тахсыбыт ырыалар”  үбүлүөйдээх кэнсиэр;

20.00 — “Ахтан-санаан ааһыахха”  литературнай түмсүү кыттылаахтарыгар, ыалдьыттарыгар анал тэрээһин.

 

Балаҕан ыйын 2 күнэ, бээтинсэ:

Ыытыллар сирэ: Г.И.Саввинов-Уус Киргиэлэй аатынан Култуура уонна сынньалаҥ паарката, Тойон түһүлгэ, Сунтаар сэл.

10.00 – кыттылаахтары бэлиэтээһин;

10.00 – түһүлгэлэри оҥоруу;

10.00– хорчуоппалар түһүлгэлэрэ;

10.00 — “Ньургуһун 50 сыла” кинигэ быыстапката;

10.00 — “Мин оҕолорум – мин хоһооннорум” кинигэ атыыта, автографтар түһүлгэлэрэ;

10.00 – Уус уран оҥоһуктар, сувенирдар быыстапка-атыылара;

11.00 “Сунтаар миигин ыҥырар” саха норуодунай  бэйиэтэ Л.А.Попов аатынан улуустааҕы ырыа-хоһоон VI түһүлгэтин үөрүүлээхтик арыйыы;

13.30 — “Хоһуйар хоһооннорбор олох кинигэтин арыйабын…” хоһоонньуттары истии;

17.30 —  “Кэмчи кэрчиктэр” – бэриллибит тиэмэнэн кылгас кээмэйдээх тута хоһуйууга күрэх;

18.00 – “Сунтаар сылаас кутаатын, түөспэр илдьэ сылдьабын” – тэрээһини үөрүүлээхтик түмүктээһин, наҕараадалары туттарыы:

–          “Ньургуһун хоһуйар түһүлгэтэ” күрэх түмүгэ;

–          “Кэмчи кэрчиктэр” күрэх түмүгэ;

–          “50 сылга – 50 бастын” аахсыйа түмүгэ.

Билсэр төлөпүөннэр: 8(41135)22191 бибилэтиэкэ, Жиркова Изабелла Ивановна 89142897734, Томская Мария Ивановна 89142698807.

 

«50 сылга — 50 бастыҥ айымньы»

Сунтаар улууһугар «Ньургуһун”  литературнай түмсүү тэриллибитэ 50 сылыгар аналлаах «50 сылга — 50 бастыҥ айымньы» аһаҕас аахсыйа биллэрилиннэ.

«Сунтаар улууһа (оройуона)» муниципальнай тэриллии дьаһалтата,  Сунтаар улууһун култууратын  уонна айылгытын  салалтата, улуустааҕы кииннэммит бибилэтиэкэ ситимэ, «Ньургуһун» литературнай түмсүү тэрийэр аахсыйаларын сүрүн сыалынан-соругунан айар-суруйар дьоҕурдаах дьону, саҥа ааттары арыйыы, айар талааннары өйөөһүн буолар.

Аахсыйаҕа 18-тан үөһээ саастаах ким баҕарар көҥүл тиэмэҕэ 1-2 тэттик кэпсээнинэн кыттар. Айымньыта эрдэ  ханна да бэчээттэммэтэх буолуохтаах.

Ирдэбиллэрэ:

-Айымньы көмпүүтэргэ (WORD) Times New Roman 14 кээмэйинэн, 1.5 арытынан бэчээттэммит буолуохтаах, 13 сирэйтэн тахсыа суохтаах (21 тыһ.бэлиэттэн  турар);

-Кыттааччы толору аата, дьаралык аата, төрөөбүт сыла, аадырыһа, төлөпүөнэ булгуччу толору ыйыллыахтаах;

Айымньы атын дьон ааптарыскай бырааптарын  кэспэтин ааптар бэйэтэ мэктиэлиир.

Айымньыларгытын атырдьах ыйын 31 күнүгэр диэри sunlibrary.orch@mail.ru электроннай почтаҕа эбэтэр Л.А. Попов аатынан Сунтаардааҕы киин бибилэтиэкэ  ааҕар саалатыгар аҕалан биэриэххитин сөп (электроннай көрүҥүн).

Тэрийээччилэр иһитиннэрбиттэринэн, аахсыйа түмүгэ балаҕан ыйын 2 күнүгэр  Сунтаар нэһилиэгэр Л.Попов аатынан «Сунтаар миигин ыҥырар-2022» ырыа-хоһоон түһүлгэтин кэмигэр биллиэҕэ. Бастыҥ айымньылар саҥарар кинигэ таһаарыытыгар  киириэхтэрэ, кыттааччылар туоһу сурук тутуохтара.

Кыттыан баҕалаахтар 22-1-91, 89142698807, 89148209962 нүөмэргэ эрийэн билсиҥ.

 

Саргылана МЕРКУРЬЕВА:

«1972 сыллаахха Сунтаарга  айар үлэнэн дьарыктанар дьону түмэн, “Ньургуһун” диэн ааттаах литэрэтиирнэй куруһуок тэриллибитэ. Салайааччынан “Ильич уоттара” хаһыат үлэһитэ,  энтузиаст-суруналыыс Серафим Саввинов талыллыбыта. Кини  биллиилээх, үрдүк култууралаах киһи этэ. Барыны-бары интириэһиргиирэ. Иркутскайдааҕы университет суруналыыстыкаҕа факультетын бүтэрэн, иккис үрдүк үөрэхтэммитэ.
Серафим Пудович айар идэлээх дьоннуун ыкса алтыһан, “Ньургуһун” түмсүү сэбиэтинэн талыллыбыта. Түмсүүгэ сааһыттан тутулуга суох айар талааннаах дьон, култуура эйгэтин үлэһиттэрэ, уус тарбахтаахтар бары кытталлара.
“Ньургуһун” түмсүү бастаан 12 киһилээх тэриллибитэ. Онно саҕаалаабыт Николай Сергеев, Альберт Бүлүүйүскэй, Василий Меркурье, Юрий Гурьев, Наталья Яковлева,  о.д.а. кэнникинэн кэккэлэрэ сыыйа кэҥээн испитэ.
Поэзияҕа, прозаҕа боруобаланан эрэр ааптардар айымньыларын саха тылын учуутала Николай Саввинов, бэйиэттэр Альберт Бүлүүйүскэй, Николай Сергеев, Уйбаан Нуолур, Аким Кондратьев, суруналыыстар Серафим Саввинов, Василий Меркурьев ырыталлара, сүбэ-ама биэрэллэрэ. Хас биирдиилэригэр  уопуттаах киһи сыһыарыллара. Чахчы тыыппалаахтарын хаһыат  “Ньургуһун” литературнай страницатыгар таһаараллара. Василий Меркурьев эдэр ааптардар айымньыларын “Ильич уоттарыгар” бэчээттэтэрэ.
Бэйиэт Николай Сергеев доҕоро Дмитрий Поповтуун оройуон хаһыатыгар кыттыһан кэрэспэдьиэннииллэрэ, эргэ хаартыскалары улаатыннаран, үлэ дьонун кэпсиир очеркалары, репортажтары, ыстатыйалары, ахтыылары тиһигин быспакка бэчээттэтэллэрэ».

Надежда ЕГОРОВА, «Саха сирэ», edersaas.ru

0
0
Telegram @edersaas20