Ааспыт эрэ нэдиэлэ бүтүүтэ Сунтаар улууһуттан төрүттээхтэр Дьокуускай куоракка үгэскэ кубулуйбут, сыл түмүктэрин таһаарар көрсүһүүгэ ыллаан-туойан аастылар.
edersaas.ru
Көрсүһүү кэмигэр “Сунтаар – олоҥхо дойдута” аат туоһу сурукка киирбитин туһунан иһитиннэрбиттэрин, Сунтаартан төрүттээхтэр бары үөрэ, киэн тутта истибиппит. Оттон соторутааҕыта интэриниэт ситимигэр “Сунтаар – Олоҥхо дойдута” диэн мобильнай сыһыарыы баар буолла.
Мобильнай сыһыарыы туһунан улуустааҕы култуура салаатын начаалынньыга, “Олоҥхо ассоциациятын” Сунтаардааҕы салаатын салайааччыта Мария Кобельянова-Тускулааналыын кэпсэттибит.
— «Сунтаар — Олоҥхо дойдута» диэн ааттанан олоҥхо тула үгүс үлэ барар. Былырыын биһиги улууспут “Олоҥхо Ассоциациятын” бастыҥ филиалынан ааттанан улахан үөрүүлээхпит. Бу күннэргэ «Сунтаар — Олоҥхо дойдута» диэн көмүс серия 7 кинигэлээх иккис таһаарыыта сүрэхтэнэр. Ону таһынан, биир сонун түгэн, аныгы үйэни кытта бииргэ хардыылаан, култуура салалтата «Сунтаар — Олоҥхо дойдута» диэн мобильнай сыһыарыы таһаарда. Ааптар «Сайдыс» култуура эйгэтин эдэр үлэһиттэрин түмсүүтүн салайааччыта, култуура салалтатын үлэһитэ Евдокия Сивцева. Бу бырайыагы улуус баһылыгын Анатолий Григорьев Граныгар киирсэн, ол үбүнэн оҥордулар. Мобильнай сыһыарыы көмөтүнэн олоҥхоһуттарбыт, олоҥхолорбут киэҥ көрүүгэ таҕыста, өссө салгыы сайдарыгар элбэх үлэ күүтүллэр, — диэн кэпсээтэ.
Онон билигин ханнык баҕарар киһи «Сунтаар — Олоҥхо дойдута» диэн сыһыарыыны төлөпүөнүгэр киллэрэн, хаһан баҕарар олоҥхону ааҕыан сөп.
Анивера АКИМОВА, edersaas.ru