Татарстан Өрөспүүбүлүкэтин киинигэр, Казань куоракка, ыытыллыбыт II Бүтүн Арассыыйатааҕы селекционер-зоотехниктар куонкурустарыгар ситиһиилээхтик кыттыбыт «Кириэстээх» ТХПК селекционер-зоотехнига Августина Трифонова Саха сирин татаардарыттан эҕэрдэ тириэртэ.
Икки күн ыытыллыбыт селекционер-зоотехниктар куонкурустарын быыһыгар исписэлиистэр идэлэрин хайдах талбыттарын, хайдах үлэлииллэрин, туох үгэстэрдээхтэрин сырдатыыга «Үлэҕэ тапталынан» диэн номинацияҕа күрэхтэһии тэрилиннэ. Онно Августина Семеновна көхтөөхтүк кытынна. Эҕэрдэтэ да ураты буолла:
– Тыйыс айылҕалаах Саха сиригэр уон ахсыс үйэттэн олохсуйбут татаардартан эҕэрдэ! Мин дойдубар Сунтаарга олохсуйбут Файрушиннар уонна Насыровтар эһиэхэ бокулуон ыыттылар! – диэбитигэр дьэ, доҕоор үөрүү-көтүү, часкыйа-часкыйа ытыс таһыныы оргуйа түспэтэ дуо?!
Олус үөрдүлэр, сэргэхсийдилэр, бары киниэхэ ыарыйдылар. Кыыспыт даҕаны бэйэтин, үлэтин-хамнаһын туһунан кылгастык эрээри чаҕылхайдык сырдатан баран ыллаан-туойан, хомустаан болуоссаты төрүт ылан кэбистэ. Ол кэмҥэ экраҥҥа Саха сирин айылҕатын туһунан видеоны холбообуппут. Түмүгэр эмиэ татаардарыгар эргиллэн, былыр көскө кэлбит татаардар биһиги уһун, тымныы кыһыннаах дойдубутун сөбүлээн олохсуйбуттара, саха норуотун кытары уруурҕаһаннар, ыччаттара өрөспүүбүлүкэ киэн туттар дьоно буолбуттара диэтэ. Аҕа дойдуну көмүскүүр Улуу сэриигэ Насыровтартан биэс уол бэбиэскэ тутан барбытыттан үс уол сэриигэ охтубутун, кинилэри кэриэстээн Сунтаар улууһун киинигэр «Улица имени братьев Насыровых» баарын кэпсээтэ. Онуоха олохтоохтор: «Чэ, оччотугар эһиэхэ ыалдьыттыы барар эбиппит!» – дэстилэр.
Ити курдук Сунтаар кыыһа Бүтүн Арассыыйатааҕы селекционер-зоотехниктар куонкурустарыгар ситиһиилээхтик кыттыбытын таһынан, «Үлэҕэ тапталынан» номинация хаһаайката буолла, норуоттар доҕордоһууларын чиҥэттэ, анал Диплому тутта. Бу туһунан биһиэхэ куонкуруска судьуйанан үлэлээбит «Сахаагроплем» судаарыстыба бүддьүөтүн тэрилтэтин искусственнай сиэмэлээһиҥҥэ салаатын исписэлииһэ, өрөспүүбүлүкэ үтүөлээх зоотехнига Татьяна Протопопова кэпсээтэ.
Раиса Сибирякова, «Саха сирэ» edersaas.ru