Сунтаардааҕы РЭС (Якутскэнерго Арҕааҥы электрическэй ситимнэрин салаата) бу сыл саҕаланыаҕыттан магистральнай уот линияларын балачча өрөмүөннээтэ.
edersaas.ru
Улахан болҕомтону «Сунтаар– Ньурба– Үөһээ Бүлүү – Бүлүү» үрдүк күүрүүлээх линия Сунтаартан Ботомоойуга диэри учаастагар уурбуттар. Онно энергетиктар 15 баҕана чаастарын уларыппыттар уонна 15 га иэннээх солооһуну ыраастаабыттар. Бэдэрээтчит тэрилтэлэрэ 66 баҕананы уларыппыттар уонна 32 га иэннээх солооһуну ыраастаабыттар.
«Сунтаар – Тойбохой» 110-наах линияҕа РЭС үлэһиттэрэ 17 баҕана чаастарын уларыппыттар. 12 нэһилиэнньэлээх пууну уотунан хааччыйар 35 кВ күүрүүлээх уот линияларын саҥардан биэрдилэр.
«Кириэстээх – Хордоҕой», «Сунтаар – Сардаҥа», «Сунтаар – Кэмпэндээйи», «Тойбохой – Кириэстээх», «Кириэстээх– Куокуну», «Тойбохой – Уһун Күөл» ситимнэргэ барыта 67 баҕананы уларыппыттар.
Кыра күүрүүлээх уот ситимин эмиэ болҕомтоҕо ылбыттар. Хадан, Сунтаар, Тойбохой, Аллаҥа, Элгээйи, Сиэйэ бөһүөлэктэригэр 10 кВ-таах линияларга 65 баҕананы өрөмүөннээбиттэр. Билигин энергетиктар 0,4 кВ-таах ситимҥэ СИП тарда сылдьаллар.
Балаҕан ыйын 1 күнүгэр диэри 13 нэһилиэнньэлээх пууҥҥа 2,17 км уһуннаах СИП тардыбыттар, 167 баҕананы уларыппыттар.
«Энергетиктар тыа сирин олоҕун тупсарарга кыһаллаллар. Нэһилиэнньэлээх пууннары ситимниир магистральнай линиялар уонна 0,4, 6, 10 кВ ситимнэр өрөмүөннэнэн эрэллээхтик уотунан хааччыллыахтара», — диир «Якутскэнерго» генеральнай дириэктэрэ Александр Слоик.
«Якутскэнерго» ПАУо Арҕааҥы электрическэй ситимин пресс-сулууспата