Улуу Өктөөп күнүгэр Дьаархан нэһилиэгин ытык кырдьаҕастарыгар, сэрии сылын оҕолоругар «Спортфанат» батсаап бөлөх көҕүлээһининэн, «Дьаархан булчуттара» бөлөх кыттыһан Баай Барыылаах Хара тыа иччитэ — Байанай бэлэҕиттэн булт-алт араас көрүҥүттэн сэмэй бэлэхтэри оҥордулар.
Ол курдук, бэйэлэрин сыраларынан бултаабыт бултарын — ытык кырдьаҕастарбытыгар анаатылар: А.Д.Седалищев. П.Р.Кырелов, А.А.Павлов, В.В.Егоров, С.А.Гуляев, В.В. Степанов, А.Н.Тимофеев, И.А.Данилов, Ю.Н.Тихонов, С.С.Гольдеров, А.С.Васильев, А.Д.Павлов, А.В.Николаев, С.А.Григорьев, А.А.Спиридонов. Ону таһынан кэрэ аҥаардарбыт да туора турбатылар, А.А.Николаева, А.А.Маркова, Л.Н.Иванова уонна Дьокуускай куораттан биир дойдулаахпыт Иванова (Николаева) Ульяна кыттыспыттара олус хайҕаллаах. Булт үллэстиитин суруллубатах сокуонунан, кырдьаҕастарбыт сэрэбиэй түмүгүнэн туох тиксэринэн үллэһиннилэр, онон кимиэхэ туох тиксибитинэн олус дуоһуйдулар, астыннылар, барҕа махтал тылларын байанайдаах булчуттарга анаатылар. Үлэ тыыл бэтэрээннэригэр айылҕа быйаҥыттан, билиҥҥи дьаҥ кэмигэр олус эмтээх, битэмииннээх Николаева Ульяна ыыппыт мүөтүн туттардыбыт. Васильев Ариан икки куобаҕы биэрбититтэн биирэ Трифонов Бүөтүргэ тиксэн, Бүөтүр оҕонньор үөрүүтүн көрүө этигит: «Тоҕо да улаханай, эмиһэй»,- диэн сыана быста. Бэйэтэ урукку кэмнэргэ куобах бөҕөнү хоторбут кырдьаҕас. Биир куобаҕын, бу соторутааҕыта 75 сааһын туолбут Револий Кыреловка анаан туран туттарда. Биир миэтэрэлээх сыалыһар балык Татьяна Тихоноваҕа тиксибитин бачча аһы киһи ыҥыран да астатар инибин дии үөрэ-көтө хаалла. Ити курдук ытык кырдьаҕастарбытыгар хамсык кэм бары ирдэбилин тутуһан туран сылдьыспыт «Дьулуур» спортманеж тренеригэр С.С.Гольдеровка уонна күүс көмө буолбут Аҕа баһылык солбуйааччытыгар А.Н.Тихоноваҕа барҕа махтал тылларын аныыбын.
Сунтаар Дьаарханыттан П.Р. Кырелов