Сунтаар Бордоҥун дьахталлара тыраахтар көлүөһэтин холкутук өрө анньаллар
Сунтаар улууһун Бордоҥ нэһилиэгэр «Күүстээх кэрэлэр, мааны мадьынылар» диэн дьикти ааттаах күөн күрэс дьон-сэргэ интэриэһин тарта.
edersaas.ru
Былыргы үһүйээннэргэ чиэппэр күүстээх дьахталлар убаһа аҥаарын сарай үөһэ быраҕар кыахтаахтарын туһунан элбэхтик кэпсэнэр. Биһиги да ортобутугар күүстээх-уохтаах, кыахтаах-сэниэлээх дьахталлар баалларын көрдөрөр сыаллаах, аан дойду дьахталларын күнүгэр аналлаах бэртээхэй тэрээһиҥҥэ нэһилиэк тэрилтэлэриттэн түөлбэлэртэн 6 кыттааччы күөн көрүстүлэр. Бырайыак ааптара — Мария Спиридонова.
Бастакы түһүмэх —«Кэрэ-мааны сэбэрэ» дефиле. Кыттааччы дьахталлар маанытык таҥнан хааман бэйэлэрин билиһиннэрдилэр. Дьэ онтон «силомер» диэн аппараатынан сутурук күүһүн кээмэйдээн баран, бииртэн биир күүһү-кыаҕы көрдөрөр түһүмэхтэргэ илин-кэлин түсүһүү буолла!
Гиирэ оннугар 10 киилэ саахар уонна 10 киилэ рис курууппа мөһөөччүгүн өрүтэ анньан, кырдьык да, дьахталлар күүстэринэн сөхтөрдүлэр.
Модьу кылгас боробулуоханы өҕүлүтэн, 8 сыыппараны таһаардылар. Дьэ уонна түмүгэр Бордоҥ сценатыгар МТЗ тыраахтар аарыма улахан көлүөһэтин киллэрэн, кыттааччылар бириэмэҕэ өрө анньан туруорбуттара сөҕүмэр көстүү буолла.
Дьүүллүүр сүбэ биир санаанан кыайыылааҕы быһаарда. Ол курдук, Бордоҥ саамай күүстээх кэрэ аҥаарынан орто оскуола үлэһитэ Дария Николаева буолла! 2 миэстэҕэ — Светлана Докторова, 3-с миэстэҕэ — Мария Попова тигистилэр.
Анал ааттарга: «Көргө көхтөөх» — Мария Иннокентьева, «Кэрэ көстүү» — Юлиана Черепанова, «Талба мааны» — Зинаида Иванова бэлиэтэннилэр. Бары кыттааччыларга үлэлиир тэрилтэлэрэ, аймахтара, доҕотторо бэлэхтэрин туттардылар. Көрөөччүлэргэ киирии билиэтинэн «Драгоценности Якутии» фирма көмүс оҥоһуктара оонньоннулар, оттон бриллиант Зинаида Егороваҕа тигистэ. Кэрэ киэһэни күүстээх аҥаардар ырыалара киэргэттэ. Библиотекарь Надежда Петрова уонна Дмитрий Никифоров бу киэһэни иилээн-саҕалаан ыыппыттара эмиэ сонун көстүү буолла.
Маннык интэриэһинэй күөн күрэһи аны улуус таһымнаан ыытарга сананныбыт. Онон эһиил, улууспут күүстээх кэрэ аҥардара, бэлэмнэниҥ!
«Саха сирэ» хаһыат, edersaas.ru анаан Мария Спиридонова,
Сунтаар улууһа.