Аан дойду даҕаны үрдүнэн диэтэхпинэ, бука, сыыспатым буолуо, улуус баһылыктара күргүөмүнэн хомус тартылар. Кимнээҕий? Сунтаар улууһун уонна нэһилиэгин баһылыктара. Чахчы сүдү көстүү!
Бүгүн Сунтаар улууһун күннэрин чэрчитинэн Дьокуускайга кэлбит баһылыктар Хомус аан дойдутааҕы түмэлигэр ыалдьыттаатылар. Баһылык Анатолий Григорьев иһитиннэрбитинэн, маҥнайгы сырыыларыгар баһылыктар Дьокуускайга кэлэн, дойдуларын туһунан хоһоон аахпыттар эбит. Иккис сылларыгар ырыа ыллаан сөхтөрбүттэр. Үһүстэригэр улуустааҕы култуура управлениетын начаалынньыга Мария Кобельянова-Тускулаана этии көтөҕөн, хомустуурга санаммыттар.
Хомус аан дойдутааҕы түмэлин бэрэсидьиэнэ Иван Алексеев-Хомус Уйбаан: “Эһиги бары хомусчуттар буоллугут. Онон кэккэбит хаҥаата. Эһиги бэйэҕит даҕаны билбэккэ сылдьар буолуоххутун сөп, бу маннык түмсүүлээхтик уонна биир санааны ылынан хомус тардыбыт улуус бүгүҥҥүтэ суох. Онон эһиги — бастакыларгыт. Тас даҕаны дойдуларга тойоттор-хотуттар хомус тардыбыттара иһиллибэт. Эһиги саҕалааһыҥҥыт дьикти төрүөтү үөскэтэр. Сураҕын истибит атын улуустар тэринэ сатыахтара эрээри, хатылааһын буолар. Хаһан баҕарар бастакынан саҕалааһын суолтата сүдү. Ол гынан баран, бастакы ааты ылан баран төлө тутан (быраҕан) кэбиһии кыбыстыылаах суол. Онон дугдуруйдугут даҕаны охсуҥ”, — диэн тоһоҕолоон алгыс тылын тиэртэ.
Итиниэхэ улуус баһылыга: “Хомуһу 200 судаарыстыба норуот үстүрүмүөнэ гынан илдьэ сылдьарын истэн, хомус тыаһа омуктары холбоон, кинилэри кытта бииргэ хаамарга түмэр эбит диэн санааҕа кэлэр”, — диэн эттэ уонна Сунтаар улууһун баһылыктара хомуска тардыыбытын салгыы сайыннарыахпыт диэн кэс тылларын биэрдэ.
Салгыы баһылыктар өрөспүүбүлүкэҕэ киэҥник биллэр хомусчуттары иһиттилэр, тарбахха баттанар түмэли көрдүлэр итиэннэ бары күргүөмүнэн хомус тардан дьүрүһүттүлэр. Түмүккэ Хомус түмэлин дириэктэрэ Николай Шишигин хас биирдиилэригэр сэртипикээттэри, сэмэй бэлэхтэри туттартаата.
Баҕар, ким эрэ улахан ситиһиинэн сыаналаабата буолуо эрээри, чахчы саҥа, сонун көстүү. Саха хомуһа өссө биир үктэли үөһээ дабайда, инники хардыылаата.
Людмила ПОПОВА, “Саха сирэ” хаһыат, edersaas.ru