Бүгүн сарсыардаттан Сунтаар Түбэй Дьаарханын Анисимовтарын хаартыскалара социальнай ситимнэргэ хото тарҕанна.
Тыа сирин олохтоохторун сырдыгынан сыдьаайар харахтара, истиҥ мичээрдэрэ, кырдьык да, киһи болҕомтотун тардар. Кинилэр олохтон дьолломмут сирэйдэрэ сырдык таптал үйэлээҕин итэҕэтэллэр.
Соторутааҕыта 86 саастаах Анисим Васильевич уонна 80-наах Прасковья Филипповна Анисимовтар эйэ дэмнээхтик 60 сыл олорбуттарын үбүлүөйдээбиттэр. Ытык кырдьаҕастары талааннаах фотограф Евгений Урааҥхай түһэрбит.
«Таптааҥ бэйэ бэйэҕитин, кыһалҕаҕытын тэҥҥэ үллэстиҥ, сылаас холумтаҥҥытыгар ил-эйэ уйаланнын!» — диэн Евгений инстаграмҥа бу хаартыска анныгар суруйбут.
Дьоллоох буолуҥ, дьиэ кэргэҥҥит ис кутун харыстааҥ.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.