Бу күннэргэ Дьокуускай куоракка сахалыы тыыннаах тэрээһиннэр ыытылла тураллар.
edersaas.ru, Мария КОБЕЛЬЯНОВА
Кыыл Уолун нэһилиэстибэтин үөрэтии
Дьокуускайга филологическай наука доктора, профессор Людмила Ефимова уонна култуура салалтатын көҕүлээһининэн, «С.А.Зверев-Кыыл Уолун нэһилиэстибэтин үөрэтии сүрүн соруктара» сэминээр тэрилиннэ. Манна улуу киһибит аатын үйэтитээччилэр, чинчийээччилэр түмсэн үлэ торумун кэпсэттибит, туох-ханнык сыаллар сиппэккэ туралларын ырытыстыбыт. Тэрээһиҥҥэ Василий Илларионов, Розалия Бравина, Светлана Мухоплева, Туяра Илларионова, Валерий Васильев, Ньургун Афанасьев, Ольга Павлова, Галина Попова-Санаайа, Евдокия Зверева, Анна Чярина, Галина Самойлова, Анна Зверева араас ис хоһоонноох иһитиннэриилэри оҥордулар. ХИФУ устудьуоннара 46 айымньытын нууччалыы тылбаастаан эрэллэрин олус сэргии иһиттим. Анна Зверева хаартыскаларынан кинигэ бэлэмнии сылдьар эбит. Бу күннэргэ элбэх сонун иһитиннэриилэри, салгыы туох үлэлэр барыахтаахтарын туһунан кэскиллээх этиилэр олоххо киирэллэригэр ситимнээх үлэ барарыгар эрэнэбит.
Леонид Попов төрөөбүтэ 100 сылыгар
Дьокуускайга Былатыан Ойуунускай аатынан литературнай түмэлгэ Леонид Поповка туһуламмыт истиҥ көрсүһүү тэрилиннэ. Манна Сунтаартан уонна Дьокуускайтан суруйааччылар, «Бичик» кинигэ кыһатыттан, суруналыыстар, Сунтаартан, Мэҥэ Хаҥаластан аймахтара, төрөппүт уола Андрей Попов, Хомус түмэлиттэн, Ярославскай аатынан кыраайы үөрэтэр мусуойтан, Эстрада тыйаатырыттан, национальнай бибилэтиэкэттэн, о.д.а. араас эйгэ дьоно кыттыыны ыллылар. Сүрүннээн, быйылгы үбүлүөйдээх сылга туох-ханнык үлэлэр ыытыллыахтаахтара кэпсэтилиннэ. Ол курдук, Кирилл Герасимов 40 ырыатын нотаҕа таһааран кинигэ бэлэмнии сылдьар, балта Изабелла Ильинична көмүс серияҕа суруйааччы туһунан кинигэ таһаарыахтаах. Киин бибилэтиэкэ суруйааччы биобиблиографическай ыйынньыгар үлэ ыыта сылдьар. «Бичик» кинигэ кыһата Иван Мигалкин көмөтүнэн Л.Попов иккис томын бэлэмнии сылдьалларын иһитиннэрдэ.
Былырыын Сунтаардааҕы кииннэммит бибилэтиэкэ Леонид Попов аатын сүгэн саҥа дьиэтин тутуута барыахтаах. Кини аатын сүгэр Арыылаах орто оскуолата саҥа таас дьиэҕэ бу күһүн киириэхтээҕин туһунан баһылык А.В.Григорьев киэн тутта ахтан ааста. Норуот суруйааччытын аатын үйэтитиигэ ыччакка туһуламмыт элбэх тэрээһин барыахтаах, айар үлэлэрин чинчийэргэ билим кэмпириэнсийэтэ тэриллиэхтээҕэ этилиннэ, үс улуустан тардыылаах, биир аймахтан тахсыбыт үс улахан суруйааччылары: Күннүк Уурастыырабы, Леонид Попову, Иван Арбитаны түмэн биир кинигэ оҥорон таһаардахха хайдах буолуой диэн этиилэр киирдилэр. Көрсүһүүгэ Санита Ай, Амгаяна, Варя Аманатова-Алаас кыыһа, Иван Иванов, Суоһааны кини айымньыларын ырыанан-хоһоонунан иһитиннэрэн тэрээһини киэргэттилэр. Түмүккэ, Сунтаарга муус устар 9-10 күннэригэр «Олоҥхо дойдутун оһуордаах оонньуута» айар күрэскэ Л.Попов айымньыларын уус-ураннык ааҕыыга, Арыылаахха тэриллэр үбүлүөйдээх ыһыахха, төрөөбүт күнүгэр «Сунтаар миигин ыҥырар» ырыа-хоһоон түһүлгэтигэр уонна ахсынньы ыйга Дьокуускайга айар киэһэтигэр көрсүөххэ диэри диэн тарҕастыбыт.
Мария КОБЕЛЬЯНОВА-ТУСКУЛААНА, edersaas.ru саайтка анаан