Бүгүн Сунтаар улууһун Арыылааҕын олохтоохторугар ураты бэлиэ күн. Леонид Попов аатынан Арыылаах орто оскуолатын саҥа таас дьиэтин арыйыы буолла.
edersaas.ru, Мария Кобельянова
Бүгүҥҥү үөрүүлээх түгэҥҥэ Саха Ɵрөспүүбүлүкэтин үөрэҕин уонна билимин миниистирэ Владимир Егоров ыалдьыттаата.
Сунтаар улууһун Аҕа баһылыга Анатолий Григорьев уонна улуус депутаттарын Сэбиэтин Бэрэссэдээтэлэ Ульяна Попова үөрэнээччилэри, оскуола үлэһиттэрин, Арыылаах нэһилиэгин олохтоохторун эҕэрдэлээн туран, бу сана дьиэни тутууга тус кылааттарын иһин үлэһиттэргэ үрдүк наҕараадалары туттардылар.
Оскуола коллектива: «Саҥа оскуолабыт кэрэ көстүүтэ, киэҥэ-куоҥа, сырдыга, уота-күөhэ сандааран, саҥа тэриллэрэ килбэйэн киhи эрэ сүргэтин көтөҕөр, үөрүүгэ кынаттыыр, айымньылаах үлэҕэ ыҥырар. Маннык үөрүүнү бэлэхтээбит, туруулаhан туран улуус үбүнэн туттарбыт киhинэн буолар улууспут Аҕа баhылыга Анатолий Васильевич Григорьев.
Ону тэҥэ 2 сылы быhа күн-дьыл туругун аахсыбакка, тымныыны, ардаҕы, итиини-куйааhы аннынан оскуолабытын туппут бары үлэhиттэргэ: каменщиктарга, малярдарга, штукатурдарга, слесардарга, монтажниктарга, электриктэргэ, маастардарга, суоппардарга, трактористарга уонна ордук туhулаан салайааччыларга – бастакы көҥкөлөйүн туппут оскуолабыт выпускнигар Алексей Алексеевич Потаповка, тиhэҕэр тиэрдэн маннык кэрэ оскуоланы туппут «Сунтаарцеолит» хампаанньатын генеральнай дириэктэрэ Петр Михайлович Поповка, прорабтаабыт бэйэбит выпускникпытыгар Юрий Александрович Афанасьевка бу үөрбүт-чоҕулуҥнас харахтаах үөрэнээччилэр, учууталлар, төрөппүттэр ааттарыттан улахан махталбытын тиэрдэн ытыс дохсун тыаhын бэлэхтиэххэйиҥ», — диэн махтал тылларын эттилэр.
Сахалыы сиэринэн оскуола, билии кыhата үйэлээх, сырдык тыыннаах буоларыгар илбистээх иэйии истиҥин, уруйдаах тыл уранын, саргылаах саҥа буолар алгыс тыл сүрүнүн Людмила Пустолякова алгыс сиэрин-туомун ыытта.
«Саҥа дьиэ тутун – маста олорт» диэн норуот муудараһа этэринэн сиэттэрэн маҥнайгы мас олордулунна.
Мария Кобельянова-Тускулаана, edersaas.ru