Сарсын, олунньу 26 күнүгэр – биир эрэ күн Өксөкүлээх аатынан Култуура киинигэр Сунтаар улууһун күннэрин чэрчитинэн, тыа хаһаайыстыбатын оҥорон таһаарааччыларын быыстапка-дьаарбаҥкалара буолар.
edersaas.ru
Манна Тойбохойтон “Хочо”, Уһун Күөлтэн “Сулус”, Түбэй Дьаархантан “Милк-Ас”, Күндэйэттэн “Тускул”, Сунтаартан “Тирэх”, Күүкэйтэн «Уйгу» уонна Кириэстээхтэн «Үрдэл» тыа хаһаайыстыбатын кэпэрэтииптэрэ, Элгээйитээҕи үүт-эт кэмбинээтэ, биирдиилээн фермердэр бэйэлэрин бородууксуйаларын аҕаллылар.
Холобур, “Хочо”, “Сулус”, “Үрдэл”, «Тускул» кэпэрэтииптэр амтаннаах араҕас арыылара, аһытыллыбатах, убатыллыбатах, ыаммыт үүттэн оҥоһуллубут 40 %-наах сүөгэйдэрэ куорат ыалын сандалытын киэргэтэр мааны ас буоллаҕа. Кыс ортото маннык үчүгэй хаачыстыбалаах дьиҥнээх сүөгэйи булар уустук (үксүгэр убатан, аһытан, 20-28%-нааҕы оҥороллор). Оттон арыыны эмиэ убаппакка, үүт сыатын энчирэппэккэ оҥорор буоланнар, иҥэмтиэлээх, минньигэс.
Элгээйи кэпэрэтиибэ хортуосканы, кириэстээхтэр ынах, сылгы этин, предпринимателлэр Д.В. Умарова куурусса этин, И.И. Семенов дьиэтээҕи куурусса, перепелка сымыытын атыылыахтара. Бу туох да эбилигэ суох, ыраас, натуральнай ас. “Тирэх” кэпэрэтиип сир аһын эгэлгэтин хомуйан, тоҥорон да, барыанньалаан да аҕалан амсатыаҕа.
Маны тэҥэ үүт ас арааһа – чохоон, иэдьэгэй, кефир, суорат, йогурт, арыы, сүөгэй атыыга тахсыаҕа.
Бу курдук ыраах сиртэн тэринэн кэлбит хаһаайыстыбалар куорат олохтоохторун уонна биир дойдулаахтарын тыа сирин амтаннаах, минньигэс аһынан күндүлүөхтэрэ. Онон, кытаатыҥ, түбүктээх үлэттэн быыс булан, анаан кэлэн, Сунтаар аһын амсайыҥ!
Ангелина Васильева, “Саха сирэ” хаһыат, edersaas.ru