Бу күннэргэ Сунтаар улууһун дьаһалтатын 2017 сыллааҕы үлэтин отчуота түмүктэннэ. Дьаһалта салайааччылара, үлэһиттэрэ үс бөлөххө арахсан, үс күнү быһа нэһилиэктэринэн сырыттылар.
edersaas.ru
Улуус баhылыга А.В.Григорьев салайааччылаах оробуочай бөлөх Кэмпэндээйи, Күүкэй, Кутана нэhилиэктэриттэн отчуоту саҕалаатылар. Дьон олоҕун-дьаhаҕын кытта билсэн, туһааннаах боппуруостарга миэстэтигэр быhаарыылары ылыннылар. Кэлиҥҥи сылларга отчуокка дьон кыттыыта элбээбитэ тута харахха быраҕыллар. Нэhилиэктэрин, улуустарын, өрөспүүбүлүкэлэрин туhугар кыhаллаллара уонна бииргэ үлэлииргэ бэлэмнэрэ киhини үөрдэр. Иккиһинэн, дьон-сэргэ түмсүүлээҕин туоhулуур.
Салгыы бу бөлөх Аллыҥа, Тойбохой, Куокуну нэhилиэктэринэн сырытта. Олохтоохтор тыын суолталаах боппуруостары ыйыталастылар, туруорустулар. Улуустааҕы киин балыыhа, тыа хаhаайыстыбатын, Сунтаардааҕы РЭС тэрилтэлэрин үлэтин тула боппуруостар киирдилэр. Онуоха, туһааннаах тэрилтэ салайааччылара тута ыйытыыларга хоруйдаатылар.
Төрдүс күнүгэр «Бартыһаан» култуура киинигэр отчуоттуур бөлөх улуус саламтатын сыллааҕы үлэтин Сунтаар нэһилиэгин олохтоохторугар иннигэр отчуотунан түмүктээтэ. Отчуоту көрө-истэ, санааларын атастаһа 295 олохтоох кэлэн кытынна. Быйыл хаһааҥҥытааҕар даҕаны элбэх ыччат кэлбитэ кэрэхсэбиллээх.
Бастыҥ үлэһит дьоммут 2017 сылга «Үлэ киһитин урууйдуур» сыла биллэриллибититтэн аһара диэн астыммыттарын бэлиэтээтилэр. Онон улуус саламтатын үлэтэ сөптөөхтүк дьаһанан олорорун туоһута бу буолар.
2018 сылга «Бэйэ оҥорон таһаарыы» сылын биллэриллибититтэн олохтоохтор сэргии иһиттилэр уонна өссө күүскэ тахсыылаахтык үлэлииллэригэр эрэнэллэрин эттилэр.
Түмүгэр, улуус аҕа баһылыга А.В.Григорьев бииргэ үлэлии сылдьар хамаандатыгар, улуус олохтоохторугар биир санаанан салайтаран түмсүүлээхтик үлэлииргэ ыҥырда.
Тимур Иванов, Сунтаар, edersaas.ru сайтка анаан