Сунтаар улууһун баһылыга А.В.Григорьев баһылык солотугар киирдэ киирээт суруналыыстары түмэн, дойдубут олоҕун-дьаһаҕын сырдатыыга улахан болҕомтону уурбута. Дьокуускай куоракка бу сыл саҕаланыыта үгэскэ кубулуйбут Сунтаартан төрүттээх суруналыыстар көрсүһүүлэрэ бэрт сэргэхтик ааста.
edersaas.ru
Cыл аайы дойдутун, дьонун туһунан элбэх сырдатыылаах суруналыыстарга бастыҥ ааттар иҥэриллэллэр. Былырыын Наталья Михалева – Сайа, Марта Николаева, Анивера Акимова бастыҥ аатын сүкпүттэрэ уонна “Саха” НКИК ханаалыгар үлэлиир Елизавета Егорова, Туяра Федорова бэлиэтэммиттэрэ. Быйыл суруналыыстар ааспыт сыл ахсынньытыгар диэри туох-ханнык үлэни оҥорбуттарын ыытан кыттааччы элбэх. Оттон бастыҥ аатын Анивера Акимова ылла, кини тус бэйэтэ 30-тан тахса суруйуулары оҥорбут уонна “Эдэр саас” сайтыгар быыстала суох Сунтаар иһитиннэриилэрин таһааран кэллэ. Ону кытта Инстаграмҥа анал “Сунтаар сонуннара” диэн страница арыйда. Иккис бочуоттаах миэстэни Надежда Егорова – Намылы ылла, кини биир дойдулаахтарын “Саха сирэ” хаһыакка элбэх сырдатыыны оҥордо, ону кытта үһүс миэстэни эмиэ “Саха сирэ” хаһыат эдэр кэскиллээх суруналыыһа Ангелина Васильева буолла. Анал ааттары Афанасий Гуринов – Арчылан, Валериан Николаев ыллылар. Мантан сиэттэрэн эһиилги сылга өссө элбэх суруналыыстар кыттыыны ылан дойдубут аата ааттаныа диэн санаалаахпыт.
Дьоро киэһэ ирэ-хоро дойдубут сайдыытыгар туһуланар кэскиллээх кэпсэтиилэр оҥоһулуннулар, ол курдук “Сунтаар сонуннара” хаһыат электроннай көрүҥэр суруйтарыыны киллэриэххэ, бииргэ түмсэн дойдубутун сырдатар бырайыак олохтуохха о.д.а. Тэрээһин түмүгэр “Ньургуһун” литературнай түмсүү салайааччыта буоламмын “Сунтаар” туһунан хоһоонно айыҥ диэн сорудахтаатым, онно аҕыйах мүнүүтэ иһигэр айыллыбыт сорох кыттааччылар хоһооннорунан суруйуубун түмүктүүбүн:
Сунтаар суруналыыстарын көрсөммүн
Сунтаарбын дойдубун санаатым,
Сайаҕас дьонноох-сэргэлээх,
Сандаарар күннээх Кутанабын,
Оҕо саапын эргитэн ылан
Олуһун долгуйдум, астынным
Лия Барбасытова, “Саха” НКИК “Күнчээн” сыһыарыытын редактора:
Сунтаарым төрүт дойдум дьонун көрсөн
Ырааҕы-ааспыты санаатым.
Сүрэҕим ааспыты ахтан олуһун уйадыйда
Маргарита Винокурова, “Наш университет” хаһыат үлэһитэ:
Сунтаарым мин дууһам биһигэ –
Сиргэ кэлбит аналым туоһута,
Дьылҕабын түстээбит олоҕум оҥкула
Ыллыктаах суолум эрэллээх аргыһа
Анна Налимова, СӨ Айылҕа харыстабылын министиэристибэтин суруналыыһа:
Мин дьолум биһигэ киэҥ Сунтаар,
Тымныыны дьайҕарда сылытаар,
Сүрэҕи-дууһаны өтөр-наар
Чуумпутук, сырдыктык эн аймаар
Мэхээс Серкан:
Төрөөбүт, улааппыт, үөрэммит
Үлэлиир аартыкпын арыммыт
Дойдум миэнэ – Сунтаар
Сүрэхпэр, дууһабар мэлдьи баар.
Федор Рахлеев, “Ситим” медиа үлэһитэ:
Быйылгы көрсүһүүгэ эдэр суруналыыстар кыттыһан сүүрбэттэн тахса буолан түмсүбүт буоллахпытына, билигин куйаар ситимин бөлөҕөр өссө да элбээн Сунтаар суруналыыстара бары эйгэҕэ баар да эбиппит, элбэх да эбиппит дэһэбит!
Мария КОБЕЛЬЯНОВА — ТУСКУЛААНА