Астрологияҕа 2020 сылтан саҕалаан, Балыктар кэмнэрэ бүтэн, Күрүлгэн (Водолей) эрата саҕаламмыта. Бу квантовай уларыйыы кэмигэр планетаҕа бары хайысхаларынан араас дьайыылар буолаллар. Пандемия саҕаламмыта эмиэ мээнэҕэ буолбатах.
Дьон саҥа суолу, саҥа тирэҕи көрдүүллэр, урукку былааннара уларыйар, алдьанар. Сороҕор олорон кэлбит олохторун суолтата сүппүт курдук сананаллар. Уопсастыбаҕа этиһии, өйдөспөт буолуу, бэйэ-бэйэни сиэһин сытыырхайыан сөп. Бу бүтүн судаарыстыбаларга, планетаҕа эмиэ сыһыаннаах. Араас хааччахтар үөскүүллэр. Бэл диэтэр, магнитнай тулааһын сыҕарыйар, Күн олус күүһүрэр (сотору-сотору магнитнай буурҕалар буолаллар), килиимэт, күн-дьыл туруга түргэнник уларыйар.
Балыктар эраларыгар тыһыынчанан сылларга охсуһуу, өлөрсүү, кулуттааһын, сэрии айдаана элбэх этэ. Водолей кэмигэр киирэргэ киһи бэйэтэ эмиэ уларыйыахтаах:
* урукку кутталыттан, абааһы көрүүтүттэн, хомолтотуттан, хом санаатыттан, бэйэмсэх буолууттан, хааччахтыыр санааларыттан босхолонуохтаах;
* саҥа эниэргийэлэргэ сөп түбэһэр курдук, уларыйыахтаах, үрдүк тэтимнээх иэйиилэринэн (үөрүү, махтал, таптал, дьол) олоруохтаах. Оннук уларыйбатаҕына, олоҕор ыарыы, араас кыһалҕа, табыллыбат буолуу арахпат.
Баабыр сыла
Үүнэр 2022 сыл бэлиэтэ – халлаан күөҕэ өҥнөөх, уу Баабырын (тигр) сыла. Илиҥҥи халандаарынан Баабыр сыла олунньу 1 күнүгэр саҕаланар уонна 2023 сыл тохсунньу 21 күнүгэр түмүктэнэр.
Бу сыл уларыйыылартан куттаммат дьоҥҥо ордук табыгастаах буолуо. Ол курдук, үлэни уларытар, көһөн барар буоллаххытына, олоххутун бүтүннүү уларытыаххытын сөп.
Баабыр — күүстээх, көҥүл санаалаах, хорсун, инники күөҥҥэ сылдьар кыыл. Кини курдук хорсуннук иннигит диэки баран иһэр буоллаххытына, сыл элбэх табыллыыны аҕалыа.
Саҥа дьылы көрсөргө Баабыр сөбүлүүр өҥнөрүнэн: кыһыл көмүс, кытархай араҕас, от күөҕэ, халлаан күөҕэ таҥастаах буолар, дьиэ ис бараанын, дьуолканы киэргэтэр ордук буолуо. Ол оннугар кугас уонна фиолетовай өҥнөрү талымаҥ.
Быйылгы бырааһынньыктааҕы сандалыга эттэн араас бүлүүдэлэр баар буолаллара бааламмат. Куоскалаах ыаллар, бу күннэргэ дьиэтээҕи кыылгытын маанылааҥ, кини син биир Баабыр аймаҕа буоллаҕа.
Сыл бүтүөр диэри тугу гынабыт?
Ааһан эрэр сылы этэҥҥэ түмүктээн, дьыаланы-куолуну үмүрүтэн, олохпутугар саҥаны киллэрэр курдук, үүнэр сылга сөпкө бэлэмнэниэхтээхпит. Рейки маастара Наталья Весна маннык сүбэлиир:
1. Күнтэн күн көһөрөн, оҥорбокко, хаалларан иһэр дьылаларгытын испииһэктээҥ. Баҕар, ол куукуна ыскаабын аана алдьаммыта буолуо, баҕар, былырыыҥҥы нолуогу төлөөһүн. Бу маннык оҥоһуллубакка хаалбыт дьыалалар киһи эниэргийэтин “оборон сииллэр”. Онон Саҥа дьылга үктэнэргэ, төһө кыалларынан, соһуллар “кутуруктары” суох оҥорорго кыһаллыҥ.
2. Иэскитин төнүннэриҥ, бары төлөбүрдэри төлөөҥ, эрэннэрбиккитин толоруҥ. Санныгытыттан сүгэһэр түспүтүн курдук буолуо, соччонон үп-харчы өттүгэр табыллыаххыт.
3. Дьиэҕэ туох эрэ алдьаммыт баар буоллаҕына, оҥоруҥ. Сатаан оҥоһуллубат буоллаҕына, быраҕыҥ. Эргэрбит эрээри, үчүгэй хаачыстыбалаах малы-салы туттубат буоллаххытына, атыылааҥ, эбэтэр, наадыйар дьоҥҥо биэриҥ.
4. Олорор дьиэҕитин кылбаччы сууйуҥ-сотуҥ, көмпүүтэргитин, төлөпүөҥҥүтүн, электроннай буостаҕытын ыраастааҥ. Ол кэнниттэн дьуолка туруоран, дьиэҕитин күлүмүрдэтэн, киэргэтэн кэбиһиҥ. Саҥа эиэргийэ ыраас, сырдык дьиэҕэ кэлэр.
5. Киһиэхэ дэлэй баар буоллаҕына, ону үллэһиннэххинэ, ол дэлэйиҥ өссө үүнэр, эбиллэр. Онон сыл бүтэһигэр аһымал дьыаланан дьарыктанар үчүгэй.
6. Сыл түмүгүн таһаарыҥ. Ааһан эрэр сылга туох суолталаах буолбутай? Онтон туох түмүктэри оҥоруохха сөбүй? Бу сыл туох үтүөнү аҕалла?
7. Махтал испииһэгин оҥоруҥ. Махтал киһи ауратын ыраастыыр, сырдыкка сирдиир. Хас биирдии чугас киһигитигэр, үтүөнү оҥорбут дьоҥҥо тус бэйэлэригэр махтаныҥ, бырастыы гынаргытын да умнумаҥ.
8. Сыл бүтүөр диэри биир баҕа санааҕытын толоруҥ. Оччоҕо кэлэр сылга баҕа санаалар чэпчэкитик туолар буолуохтара.
9. Өбүгэлэргитигэр махтанар, ытыктыыргытын көрдөрөр бырааһынньыгы тэрийиҥ. Төрөппүттэргитин, эбэлэргитин-эһэлэргитин, эбэтэр, кырдьаҕас аймаххытын кытта көрсөн, эргэ хаартыскалары көрө-көрө, уруккуну-хойуккуну ахтыһыҥ, төрүттэргит олохторун билэ сатааҥ, кинилэргэ махтаныҥ. Киһиэхэ өбүгэлэрэ улахан күүһү биэрэллэр, араҥаччылыыллар.
10. Икки испииһэги оҥоруҥ:
а). Тугу суох гыныаххытын баҕараргытын (куттал, хомолто, соҕотохсуйуу, табыллыбат буолуу, о.д.а.). Бу испииһэги күн саамай кылгыыр кэмигэр (ахсынньы 21 күнүгэр) диэри суруйан баран, уматан кэбиһиҥ.
б). Кэлэр сылга баҕа санааларгытын ыксаабакка, эрдэттэн суруйуҥ.
Айар куттаах дьоҥҥо бааттаах кэм
Ахсынньы 29 күнүгэр Юпитер – табыллыы, дьол планетата Балыктар бэлиэлэригэр киирэр. Онон Балык бэлиэлээхтэри бу сыл үчүгэй “хараҕынан көрөр”. Ыам ыйын 10 күнүгэр диэри Юпитер баһылыыр-көһүлүүр балаһыанньалаах буолар, онон бу тыҥаан турар ыарахан бириэмэ халбарыйыан, үтүө сонуннары аҕалыан сөп эбит. Онон бу кэмҥэ туттумахтаан хаалыахха наада – оччотугар тапталга да табыллыылаах, үлэҕэ, үпкэ-харчыга да барыстаах буолуохха сөп. Ордук айар куттаах дьоҥҥо бааттаах кэм.
Саҥа дьыл түүн баҕа санаалары суруйан, сыал оҥостон, ыам ыйыгар диэри сорунуулаах дьайыылары оҥорон барыахха наада. Табыллыыны, бааттаах олоҕу тардыаххытын баҕарар буоллаххытына, бу кэмҥэ харчыгыт сорох чааһын дьоҥҥо көмөлөһөр аһымал аахсыйаҕа биэриҥ.
2022 сылга астрологтар өтө көрүүлэрэ
Галина Караулова, астролог:
— Саҥа дьыл кэнниттэн пандемия хааччахтааһыннарын үгүс өттө сымнаан барыаҕа. Дойдулар кыраныыссалара аһыллан барыахтара, мэдиссиинэ өссө күүскэ сайдыаҕа, быһыыны биэрии хаамыыта да биллэ тэтимириэҕэ. Ол да буоллар, кулун тутарга-муус устарга “ковид” өссө биир долгуна кэлиэҕэ. Үчүгэйэ диэн, миэдиктэр коронавируһу сатаан “муоһалыырга” үөрэниэхтэрэ.
Сыл иккис аҥаарыттан саҥа бырайыактары, биисинэс-былааннары олоххо киллэрэргэ табыгастаах кэм. Сайын олус куйаас буолуоҕа, ордук от ыйын бүтүүтэ-атырдьах ыйын саҥата. Бэлиитикэҕэ улахан киирсиилэр буолуохтарын сөп. Уопсайынан, бу кэмҥэ иирсээҥҥэ, этиһиигэ-охсуһууга киирэн биэримэҥ. Эниэргийэҕит элбэх буоллаҕына, сүүрэн-көтөн, үлэлээн-хамсаан, спордунан дьарыктанан, ситиһиилэнэ сатааҥ. Ол да буоллар, айылҕаҕа элбэхтик сылдьан, сынньанаргытын умнумаҥ.
Күһүөрү, алтынньыга диэри үгүс түбүк баар буолуо. Ол үрдүнэн үлэ түмүгэ көстөн биэриэ суоҕа. Онон бытаара түһэн, барытын ырытан, анааран көрөр, толкуйдуур ирдэнэр.
Сыл бүтэһигэр үп-харчы өттүгэр уустуктар көстүөхтэрин сөп, онон улахан атыыны бу кэмҥэ былааннаамаҥ, уурунуу харчылаах буолар үчүгэй. Ахсынньыга бары түбүк, кыһалҕа аҕыйаан, саҥа 2023 сылы бырааһынньыктыы настарыанньалаах, инникигэ эрэллээх көрсүөхпүт.
Михаил Левин, Астрология академиятын ректора:
— Бэлиитикэҕэ авторитарнай салайыы кэмэ түмүктэнэн эрэр, ол эрээри бу балачча уһуннук уонна ыарыылаах соҕустук барыаҕа. Былаас сүрүн болҕомтотун тас сыһыаннаһыыларга буолбакка, ис бэлиитикэҕэ уурар буолуоҕа, дьон олоҕо чэпчииригэр кэккэ миэрэлэр ылыллыахтара. Цифровизация өссө күүскэ сайдыаҕа.
Евгений Волоконцев, Классическай астрология үрдүкү оскуолата:
— Сыл саҕаланыытыгар икки планета төттөрү хаамар балаһыанньаланыахтара (ретроградное положение). Онон чугас сыһыаҥҥа, тапталга (Венера) сэрэхтээх буолуҥ, алҕаһы, көннөрүллүбэт сыыһаны оҥорон кэбиһиэххитин сөп. Ыам ыйын иккис аҥаарыгар Юпитер Овен бэлиэҕэ киирэр. Кэтээн көрдөххө, маннык түгэҥҥэ улахан баһаардар буолаллар, судаарыстыбалар, гражданнар кыраныыссаларын көмүскээн, иирсээҥҥэ киириэхтэрин сөп. Хомойуох иһин, быйыл уокка да умайыы, ууга да барыы баар.
Нумерологияҕа 2 сыыппара – аанньал чыыһылата буолар. Онон үс 2 сыыппара баара – үтүө бэлиэ. Үүнэр сылга үгүс үтүө дьыала оҥоһуллуо, бэйэ-бэйэҕэ болҕомтолоох буолуу, көмөлөсүһүү үксүөҕэ.
Түмүктээн эттэххэ, төһө да пандемия, кириисистэр, килиимэт уларыйыыта буоллар, үүнэр 2022 сыл бу иннинээҕи 2021, 2020 сыллартан быдан чэпчэки, сымнаһыар буолара күүтүллэр.
Ангелина Васильева, «Саха сирэ» хаһыат, edersaas.ru
Хаартыска:
https://www.nippon.com/ru/japan-data/h01200/