Тохсунньу 7 күнүгэр «Саха» НКИХ уонна Саха цииркэтин салалтатын «Икки сулус» («Две звезды») диэн холбоһуктаах тэрээһиннэрэ буолуоҕа.
edersaas.ru
2009 сыллаахха «Саха» НКИХ эдэр үлэһиттэрэ сүбэлэһэн баран, саҥа бырайыагы тэрийэргэ санаммыттара. Ол үлэлэрэ «Икки сулус» диэн сүрэхтэнэн, көрөөччүлэр биһирэбиллэрин ылбыта. Ороһуоспа күнүгэр түбэһиннэрэн ыытыллар Саҥа дьыллааҕы сырдык тэрээһин, кырдьык да, көрөөччүгэ күүтүүлээх бырааһынньыгынан буолла.
— Тэрээһин биэс сыллаах үбүлүөйүн ыытан баран, аҕыйах сылга тохтуу түһэн ыллыбыт. Ол эрээри көрөөччүлэрбит көрдөһүүлэринэн бу бырайыакпытын быйылгыттан эмиэ салгыырга сананныбыт, — диэн кэпсиир «Икки сулус» бырайыак тэрийээччилэриттэн биирдэстэрэ Ньургуйаана Васильева. Тэрээһин тохтуу сылдьыбыт төрүөтэ – Ньургуйаана «экраннай искусствоведение» диэн хайысхаҕа наука кандидата буолаары, аспирантурантаҕа үөрэниитин кытта ыкса сибээстээх. Дьэ, онон быйыл алтыс сылын ыытыллар дьоҥҥо номнуо сөбүлэппит тэрээһиммит цииркэ аренатыгар бэйэтин сүгүрүйээччилэрин эмиэ түмүөҕэ. Үс сыл устата тэлэбиисэринэн да, цииркэҕэ кэлэн да көрөөччүлэр «Икки сулуһу» суохтаатылар диэххэ сөп. Киһи үксэ: «Ороһуоспа күн туох эрэ тиийбэт курдук», — дииллэрэ оруннаах.
Бырайыак «Талааннаах киһи барытыгар талааннаах», — диэн толкуйунан ыытыллар, айар куттаах салайааччылары, суруналыыстары, эмчиттэри, учууталлары, быһата, ким ис дууһатыттан ыллыыр-туойар кыахтаах дьону барыларын бииргэ түмэр буолан, бу бырайыак бэйэтин норуокка ордук биһирэттэ. Кэлиҥҥи сылларга куонкуруска аймаҕынан кытта кыттар буоллулар. Ол курдук, быйылгы бырайыакка ырыаһыт Юлиана Кривошапкина-Дьүрүйээнэ дизайнер балтын Анжелика Кириллинаны кыттыа дуэттыаҕа.
«Икки сулус» ырыа куонкуруһун бастакы дьоруойдарынан араадьыйа суруналыыһа Нарыйаана Сергеева уонна саха эстрадатын сулуһа Эрчим буолбуттара. Онтон телесуруналыыс Туйаара Харитонова уонна ырыаһыт Далаана «Икки сулус» иккис бырайыагын Гран-притын ылбыттара. 2012 с. ыытыллыбыт куонкуруска «Азия оҕолорун оонньуулара» дирекция салайааччыта Владимир Максимов уонна “Норд саунд” бөлөх кыайбыттара. 2013 с. «Баҕа санаа» диэн ырыаларынан Иннокентий уонна Анастасия Готовцевтар бастаабыттара.
2014 с. бырайыак үбүлүөйүгэр Лиза Лахно уонна полиция капитана Евгений Медведев сулустаах чаастара тосхойбута.
Оттон быйыл үс сыллаах тохтобул кэнниттэн ыытыллар бырайыакка: «Кимнээх кыттыахтарай?» — диэн санаа үгүс көрөөччүнү таайтарар кэмнэрэ кэллиллэр. «Икки сулус» буолар күнэ чугаһаан истэҕин аайы, тэрийээччилэр, ыытааччылар, кыттааччылар, көрөөччүлэр да биллэ долгуйан эрдэхтэрэ.
Холобура, «Амма улууһа» МТ баһылыга Николай Архипов бастаан утаа бэлэмнэнэригэр бириэмэ тиийиэ суоҕа диэн, кыттар дуу, кыттыбат туһунан толкуйга ылларбыт.
— Ол эрээри Ольга Сидоркевич тэрийбит ырыа ансаамбылыгар сылдьыбыт, устудьуоннуур сылларбар «Дуораан» бөлөх ырыаларын ыллыыр буолан, кыттар баҕа санаам баһыйбыта. Өбүгэлэрбэр айар куттаах дьон бааллар. Ол курдук, эһэм ыллыыр эбитэ үһү. Ходуһаҕа оттуу сылдьан ыллаан дуораһытарын туһунан ийэм үгүстүк кэпсиирэ, — диэн айар куттаах салайааччы «Саҥа күн» биэриигэ кэпсээбитин үгүс киһи истибит буолуохтаах. Кини биир дойдулааҕын, ырыаһыт Милена Борисованы кытта тапталлаах Аммаларын туһунан ыллыахтара. Милена: «Дойдум дьоно бэйэм суруйбут ырыабын ылыныахтара диэн эрэнэбин. Төрөөбүт улууһум баһылыгын кытта ыллыырым – олоҕум дьоллоох түгэнэ», — диэн эмиэ бу биэриигэ долгуйа санаатын үллэстибитэ.
«Икки сулуска» ылламмыт ырыалар хит буолаллар диэтэхпинэ сыыспатым буолуо. Ол курдук, Иннокентий уонна Анастасия Готовцевтар ыллаабыт «Баҕа санаалара» билигин дьон уостарыттан түһэрбэккэ ылллыыр ырыаларынан буолла.
Дьэ, онон аны «Икки сулуһу» долгуйа кэтэһэбит. «Икки сулус» бырайыагы 2014 сыллаах бырайыак кыайыылаахтара ырыаһыт Лиза Лахно уонна полиция майора Евгений Медведев арыйыахтара. Оттон быйылгы сыллааҕы «Икки сулуһу» уматыахтара:
Алексей КОНСТАНТИНОВ – култуура уонна искусство колледжын преподавателэ уонна ырыаһыт Майя СЕРГИНА;
Николай АРХИПОВ – «Амма улууһа» МТ баһылыга уонна ырыаһыт Милена БОРИСОВА;
Алексей СОЛОМКИН — СӨ Ис Дьыала министиэристибэтин эппиэттээх үлэһитэ уонна ырыаһыт Прасковья БОЯРКИНА;
Ильяна ПАВЛОВА – Саха театра актрисата уонна ырыаһыт Семен ЧЕНЯНОВ;
Ульяна АНТОНОВА – Тыа хаһаайыстыбытын иһитиннэрэр-консультациялыыр киинин салайааччытын солбуйааччы уонна ырыаһыт Петр КУЛАКОВСКАЙ;
Гея БУРТАХОВА – теле-араадьыйа суруналыыһа уонна ырыаһыт ЛЭГЭНТЭЙ;
Анжелика КИРИЛЛИНА – дизайнер, модельер уонна ырыаһыт Юлиана КРИВОШАПКИНА;
Александр КИМ-КИМЭН — СӨ Конституционнай суутун салайааччыта уонна ырыаһыт Надина ЭЛЬПИС;
Айаал ЛАЗАРЕВ — Рио к. ыытыллыбыт Олимпийскай оонньуу кыттыылааҕа, көҥүл тустууга Азия 2015 с. чөмпүйүөнэ уонна ырыаһыт Галя ВИНОГРАД;
Анна СОЛОВЬЕВА — СӨ Оҕо быраабын боломуочунайа уонна ырыаһыт Алена ЯКОВЛЕВА-ДИВА;
Дмитрий АРГУНОВ – теле-араадьыйа суруналыыһа, блогер уонна ырыаһыт Санита АЙ.
Кыайыылаахтар скульптор Николая ЧОЧЧАСОВ оҥорбут статуэткатынан наҕараадаланыахтара.
Бырайыак режиссера — Сергей Расторгуев. Кэнсиэри,өрүү буоларын курдук,Ньургуйаана Васильева, Светлана Трофимова, Петр Говоров, Павел Танин уонна Михаил Сергеев иилээн ыытыахтара.
Дьэ, онон «Икки сулус» бырайыак кыайыылаахтара кимнээх буолалларын билэрбит оруобуна үс күн хаалла, доҕоттор!
Елена ПОТОЦКАЯ, «Саха сирэ» хаһыат, edersaas.ru