“Саха сирэ” хаһыакка “Ыйыт-хоруйдуубут” балаһабытыгар дьиэ-уот уустук боппуруостарыгар сүбэ-ама биэрэр киһилээхпит. “Сулус” хамсаабат баай-дуол киинин салайааччыта Дмитрий Габышев соторутааҕыта Санкт-Петербург куоракка бэрт улахан тэрээһиҥҥэ кыттан кэллэ.
Дмитрий Габышев тугу билбитин-көрбүтүн туһунан санаатын үллэстэр:
— Алтынньы 5-9 күннэригэр Санкт Петербург куоракка норуоттар икки ардынааҕы дьиэ-уот конгреһыгар (Международный Жилищный Конгресс-2020) көхтөөх кыттыыны ылан кэллим. Быйыл төһө даҕаны балаһыанньабыт хамсыктан сылтаан ыарахан буоллар, конгресс 3500 кэриҥэ кыттааччыны түмэн, тэрээһиннээх үлэни ыытта.
Конгресска биллэр-көстөр бэлиитиктэр, Арассыыйа сүрүн бааннара, улахан тутар хампаанньалар уонна хамсаабат баайы-дуолу эргитэр тэрилтэ салайааччылара, эспиэрдэр уонна хамсаабат баай-дуол эйгэтигэр сыһыаннаах тэрилтэлэр кытыннылар. Ол курдук, конгресска 500 кэриҥэ бэйэлэрин эйгэлэригэр уонна үлэлэригэр күүстээх эспиэрдэр спикер буоллулар. Кинилэр бэйэлэрин уопуттарын үллэстэннэр кыттааччыларга сөптөөх билиини биэрдилэр. Конгресска хамсаабат баай-дуол 400 эйгэтигэр сөптөөх тиэмэлэргэ тэрээһиннэр сэргэхтик аастылар. 50 маастар-кылаас уонна коммерческай трениннэр ыытылыннылар.
Бу конгресска биир улахан тэрээһининэн Хамсаабат баай-дуол, тутуу уонна ипэтиэкэ эйгэтигэр CREDO-2020 национальнай куонкурус буолар. Манна биһиги тэрилтэбит — “Сулус” хамсаабат баай-дуол киинэ улахан кыайыыны ситистэ. Ол курдук, “Эрэгийиэннэр икки ардыларынааҕы мэнэйдэһиигэ эрэгийиэннээҕи бастыҥ риэлторскай тэрилтэ” (“Лучшая региональная риэлторская организация на рынке межрегиональных сделок”) диэн номинация кыайыылааҕынан ааттанныбыт.
Бу улахан ситиһии, биллэн турар, куустээх улэ түмүгэ. Ол курдук, махталым мунура суох Россия Риэлтордарын Гильдиятын вице-бэрэсидьиэнигэр, ГК “Авентин” ГК бэрэсидьиэнигэр Виноградов Валерий Николаевичка, кэргэммэр уонна дьиэ-кэргэммэр, хамаандам чилиэннэригэр өйөбүлгүт иһин дириҥник махтанабын. Конгресска сылдьан элбэх саҥа сүүрээни бэлиэтии көрдүм, элбэх маастар-кылаастарга, пленарнай мунньахха кыттыыны ыллым. Элбэх биллэр-көстөр бизнесменнэри, бэлиитиктэри уонна бэйэм эйгэбэр үлэлиир салайааччылары уонна эспиэрдэри кытта билсэн кэллим.
Чааһынай дьиэ ордук
Билигин 36 саастарын ситэ илик эдэр дьоҥҥо, дьиэ кэргэҥҥэ 2% ипэтиэкэ диэн судаарыстыбаннай бырагыраама баар буолан, элбэх эдэр ыал кыбартыыра ылан, олохторугар биир саамай улахан сыалларын ситиhэн, бэйэ дьиэлээхпит диэн үөрүүнү билэн олороллор. Бырагырааманан эдэр дьиэ кэргэн эрэ буолбакка, соҕотох уонна оҕолоох буоллахтарына, эмиэ 2% ипэтиэкэ ылыахтарын сөп. Ол эрээри тустаах бырагыраама тутулла турар дьиэҕэ сөп түбэһэр. Тутуллан киирбит дьиэ уонна хаhаайыннаах буоллаҕына, итиннэ барсыбат. Билигин бириэмэ көрдөрөрүнэн, үчүгэй варианнар куорат үрдүнэн олох аҕыйах хаалбыттар. 2 уонна 3 хостоох дьиэни ылыахтарын баҕалаахтар элбэх эбиттэр диэн бэлиэтии көрдүм. Икки хостооҕу, төһө даҕаны ыарахан буоллар, син булуохха соп. Оттон үчүгэй үс хостоохтор номнуо бүппүттэр.
Кыбартыыра сыаната саҥа тутулларга атыыланар 1 кв.м. иэнин сыаната 110-130 тыhыынча солкуобай. Сорох дьиэлэргэ 150 тыhыынча солкуобайга диэри бааллара. Мин санаабар 2% ипэтиэкэҕэ чааhынай дьиэ туттар ордук уонна быдан аҕыйах үп-харчы бараныаҕа. Үчүгэйэ диэн бэйэҥ тэлгэһэлэнэҕин уонна баҕарбыт бырайыаккынан киэҥ-куоҥ дьиэ туттарыаххын сөп. Конгресска бара сылдьаммын Арассыыйа биир улахан тутар тэрилтэтин салайааччытын кытта көрүстүм. Ол курдук, кини тэрилтэтэ финскай технологиянан килиэйдэммит буруустан Арассыыйа эрэ иhигэр буолбакка, тас дойдуларга эмиэ тутуунан дьарыгырар. Холобура, конгресс кэмигэр суһаллык Финдляндияҕа барбыта, хамсыгынан сибээстээн, кыраныыссаны саба иликтэринэн, тутуу үлэтин ыыта сылдьар буолан. Кэллим диэн биллэрбитин кэннэ үлэбитин саҕалаатыбыт. Эдэр ыаллар үчүгэй хаачыстыбалаах, үйэлээх чааhынай дьиэни идэтийбит дьоҥҥо туттарар баҕалаах буоллаххытына, биhиги тэрилтэбитигэр эрийэн билсиҥ.
Финнэр технологияларынан
Бэлэм эбэтэр анал бырайыагынан финскэй технологиянан дьиэ туттарыаххытын сөп. Маны 2% ипэтиэкэҕэ сыһыаран көрөөрү гынабын уонна эргитэр үптээх дьону кытта үлэлэспит киһи дии саныыбын.Мин Саха Сиригэр официальнай бэрэстэбиитэл буолабын. Аны туран чааhынай эрэ дьиэ буолбакка, аныгы баанньыктары, интэриэhинэй бырайыактаах улахан комплекстары, сынньалаҥ баазатын уонна да атын улахан бырайыактарынан дьарыктаныахпыт.
Бу тутааччы Антарктидаҕа кытта баанньык тутан, аан дойдуну сөхтөрөн турардаах. Ол баанньыкка Арассыыйа учуонайдара, чинчийээччилэрэ эрэ буолбакка, араас дойдуттан кэлэн көрөн, паарданан, суунан баралларын туохтааҕар даҕаны сөбүлүүллэр эбит. Антарктидаҕа күн-дьыл соччото суох буолан, уустук балаhыанньаҕа тутан түмүктээбиттэр. Интэриниэт ситимигэр “Баня в Антарктиде” диэни көрүөххүтүн сөп.
Уһук Илиҥҥи гектар диэн бырагырааманан сааһыттан тутулуга суох 2% дьиэ комплегынан туттуохха соп. Сүрүн ирдэбилэ – Уһук Илиҥиҥ гектардаах буолуута. Өссө биир ирдэбилинэн 2% ипэтиэкэҕэ кыбартыыра тутуллан үлэҕэ киирбитин эбэтэр чааhынай дьиэ тутуутун туүмүктээбиккит кэннэ. Элбэх өҥөнү оҥорор кииҥҥэ докумуоҥҥутун туттарыахтааххыт уонна бэйэҕит ааккытыгар оҥоттороот, кыбартыыраҕытыгар эбэтэр чааhынай дьиэҕитигэр пааспар остуолугар баран 9 ый иhигэр регистрацияланыахтааххыт. Бырапыыскаламматаххытына, ипэтиэкэ бырыhыана уүрдүүр. Бары ыйытыыларга кэлэн сүбэлэтиҥ.
Женни Стрюкова бэлэмнээтэ.
Хаартыска — дьоруой тиксэриитэ.