Дьону эмтииргэ, быыһыырга анаммыт идэлээх медиктэр сороҕор бэйэлэрин доруобуйаларыгар, олохторугар куттал суоһуур.
Дьокуускай куоракка «Суһал көмө» бырааһа кырбаммытын туһунан «Якутия 24» телеханаалга (http://ykt24.tv/) Доруобуйа харыстабылын министиэристибэтиттэн иһитиннэрбиттэр.
«Суһал көмө» биригээдэтэ биир аадырыска «киһини кырбаатылар» диэн ыҥырыыга кэлбит. Быраас кыыс ол кырбаммыт киһини көрөр кэмигэр хостон биир киһи тахсан, эмсэҕэлээбит киһи үрдүгэр түспүт. Онуоха быраас кырбаммыт киһини көмүскэспитигэр, кырыгырбыт киһи аны кинини охсуолаан-кырбаан киирэн барбыт.
Билигин быраас кыыс эт-сиин эчэйиитин ылан, «больничнайга» барбыт.
«Суһал көмө» быраастара ардыгар чахчы кутталлаах быһыыга-майгыга киирэн ылалларын былырыын кыһын Алдаҥҥа буолбут быһылаан туоһулуур. Онно ритуальнай өҥөлөрү толорор эйгэҕэ үлэлиир 49 саастаах предприниматель чааһынай дьиэтигэр ойоҕунаан уонна сокуоннай сааһын ситэ илик уол оҕотунаан олорон, хайдах эрэ буолан турбут — «САЙГА-410 К» карабин саатын сотору-сотору ыла-ыла, кырыгырар-кыбдьырынар буолбут. Дьоно аах куттанан, дьиэлэриттэн тахсан баран, «Суһал көмөнү» уонна полицияны ыҥырбыттара.
Аан бастакы иһитиннэриинэн, биэс полицейскай, биэлсэр, «Суһал көмө» суоппара быһылаан сиригэр кэлбиттэригэр, хаһаайын түннүгүн арыйан, массыына диэки карабинынан тирээбит, бастаан салгыҥҥа биирдэ, онтон «Суһал көмө» массыынатын туһаайан, үстэ ыппыт диэн этэ.
Кэлин бу киһи психическэй ыарыылааҕа быһаарыллан, кинини суут күһэлэҥ эмтээһиҥҥэ уурбута.
Биһиги корр., «Саха сирэ» хаһыат, edersaas.ru
Хаартыска: интэриниэттэн.