Муус устар 28 күнүн Арассыыйа үрдүнэн сыллата бэлиэтэнэр «Суһал көмө» үлэһиттэрин күнүнэн олохтуур туһунан Бырабыталыстыба уурааҕа ыам ыйын 5 күнүттэн олоххо киирбитин «Парламент хаһыата» иһитиннэрэр.
edersaas.ru
Москваҕа 122 сыл анараа өттүгэр бу күн «Суһал көмө» бастакы ыстаансыйалара тэриллибиттэрэ. Онтон ыла бу күн дьоҥҥо-норуокка суһал көмө үлэһиттэрин идэлээх бырааһынньыктарын ааҕыллар.
Бэрэсидьиэн Владимир Путин муус устар 28 күнүгэр онлайн эрэсииминэн ыытыллыбыт эрэгийиэннэр салайааччыларын кытары коронавирус дьаҥын ураты охсуһуу дьаһалларын тэрийиигэ анаммыт сүбэ мунньахха бу бырааһынньыгы судаарыстыба таһымынан бигэргэтэргэ этии киллэрбитэ. «Суһал көмө» эйгэтигэр үлэлиир быраастары, биэлсэрдэри, сиэстэрэлэри, санитардары уонна суоппардары идэлээх бырааһынныктарынан эҕэрдэлээбитэ итиэннэ бар дьоҥҥо олус наадалаах үлэлэрин иһин махталын биллэрбитэ.
– Бу былдьаһыктаах кэмнэргэ эһиги бэйэҕит бастыҥ хаачыстыбаларгытын, эр санааланыы холобурун көрдөрөҕүт. Онон чуолаан бу күнү «Суһал медицинскэй көмө» үлэһиттэрин күнүнэн олохтуур сиэрдээх буолуоҕа, – диэбитэ Владимир Путин.
Бу туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru