2018 сылга 425 эдэр ыал судаарыстыбаттан субсидия быһыытынан көмө ылан, олорор усулуобуйаларын тупсардылар.
edersaas.ru
Ону таһынан, 134 ыал: инбэлииттэр, сэрии бэтэрээннэрэ, бойобуой дьайыылар бэтэрээннэрэ, Уһук Хоту оройуоннарыттан көһөн барааччылар, уо.д.а. эмиэ босхо дьиэлэннилэр.
Тутуу министиэристибэтэ иһитиннэрбитинэн, тулаайах уонна көрүүтэ-истиитэ суох хаалбыт оҕолору дьиэнэн хааччыйарга 2016 сылтан тус сыаллаах үлэ ыытыллар. Онон 1 миллиард солкуобайтан тахса үп-харчы туһаныллан, тулаайах оҕолорго 570 дьиэ тутуллубут уонна атыылаһыллыбыт. 2016 сылтан уочарат икки сылынан кыччаан биэрбит. Ол эбэтэр, сайабылыанньа биэрэн баран, эһиилигэр дьиэ ылыахха сөп буолбут.
Бу сылга 666 киһини дьиэнэн хааччыйарга 1,366 млрд. солк. көрүллүөхтээх. Онтон хаалбыт 334 киһи 2020 сылга хааччыллыахтара. Ону тэҥэ, биэстэн элбэх оҕолоох дьиэ кэргэттэри дьиэнэн хааччыйыы бырагырааматын үбүлээһин кээмэйин үрдэттилэр.
Саха сиригэр хаарбах туруктаах дьиэ ахсаана дойду үрдүнэн саамай элбэх. 2017 сыл тохсунньу 1 күнүгэр диэри ааҕыллыбытынан, 61 тыһыынча киһи олорор 3586 элбэх кыбартыыралаах дьиэ хаарбах туруктааҕынан ааҕыллыбыта. Бу кыһалҕаны быһаарарга “Олорор дьиэ уонна куорат эйгэтэ” национальнай бырайыак чэрчитинэн, 61 млрд. солк. көрүллүбүт.
Ангелина Васильева, “Саха сирэ” хаһыат, edersaas.ru