Судаарыстыбаннас күнэ: Евгений Чекин Максим Аммосов өйдөбүнньүгэр сибэкки уурда
Саха Өрөспүүбүлүкэтин Судаарыстыбаннаһын күнүнэн бырабыыталыстыба бэрэссэдээтэлэ Евгений Чекин Максим Аммосов өйдөбүнньүгэр сибэкки ууруутун сиэригэр-туомугар кытынна, миитиҥҥэ тыл эттэ.
Евгений Чекин, бырабыыталыстыба бэрэссэдээтэлэ:
— Элбэх омук биир дьиэ кэргэн курдук иллээхтик олорор хотугу өрөспүүбүлүкэтигэр сайдыы саҥа түһүмэҕин арыйан, 1990 сыллаахха балаҕан ыйын 27 күнүгэр Саха Өрөспүүбүлүкэтин Судаарыстыбаннаһын туһунан Декларация ылыллыбыта, — диэтэ Евгений Чекин. — Бүгүн биһиги өрөспүүбүлүкэ судаарыстыбаннаһын төрүттээбит ытык дьоммутун, Саха сирин социальнай-экономическай сайдыытыгар сүҥкэн кылааттарын киллэрбит салайааччылары, бастыҥ үлэһиттэри ахтан-санаан ааһабыт. 95 сыл анараа өттүгэр, 25 саастаах эдэркээн Максим Аммосов хомуньуус баартыйа салайааччыта Иосиф Сталиҥҥа тылын ылыннаран, Саха автономнай өрөспүүбүлүкэтэ тэриллэрин ситиспитэ. Максим Кирович төрөөбүт норуотун иннигэр оҥорбут өҥөтө сүҥкэн. Күн бүгүн кинини Россияҕа эрэ буолбакка, Казахстаҥҥа уонна Киргизияҕа эмиэ кэриэстииллэр. Кини аатын өрөспүүбүлүкэ сүрүн үрдүк үөрэҕин кыһата, Хотугулуу-Илиҥҥи федеральнай университет сүгэр, кини аатынан Дьокуускайга, Бишкеккэ, Карагандаҕа уулуссалар, оскуолалар уонна мусуойдар бааллар, кини туһунан хоһооҥҥо хоһуллар, киинэ уһуллар. Чаҕылхай Максим албан аата саха алмааһыгар иҥэриллибитэ. Билигин өрөспүүбүлүкэҕэ туох оҥоһуллара барыта биһиги өрөспүүбүлүкэбит судаарыстыбаннаһын оҥкулун уурбут, олохтообут Максим Аммосов курдук чулуу дьоммут үлэлэрин салҕааһын буолар.
Раиса Сибирякова, “Саха сирэ” хаһыат, edersaas.ru
