Саха сирин судаарыстыбаннаһын күнүгэр, Хатаска, ытык саастаах 14 киһиэхэ, сэрии бэтэрээннэригэр «Нэһилиэк бочуоттаах олохтооҕо» аат иҥэрилиннэ. Биллэр төрүөтүнэн, ытык дьоммут доруобуйатын туһугар бу үтүөкэн түгэни кинилэр бэйэлэрин дьиэ кэргэннэрин кытта көрүстүлэр.
edersaas.ru
Кырдьыга даҕаны, оонньоммотох оҕо саастаах, аас-туор аччык олоҕу тулуурдарынан, дьулуурдарынан туораабыт, инникигэ эрэллээх, дьоллоох олох туһугар үлэлээн сыралаһан хамсаабыт-имсээбит дьонунан кинилэр буолаллар.
Кинилэр кимнээхтэрий?
Ануфриева Агния Михайловна, Баишев Иван Егорович, Будищева Анна Георгиевна, Бродникова Елена Михайловна, Дегтярёва Екатерина Николаевна, Желобцова София Спиридоновна, Жиркова Варвара Иннокентьевна, Колосова Клавдия Михайловна, Никифорова Анна Герасимовна, Решетникова Анисья Григорьевна, Степанов Семён Филиппович, Тихонова Клавдия Степановна, Харитонова Зоя Афанасьевна, Шепелёва Люция Григорьевна. Бары норуот хаһаайыстыбатын араас эйгэтигэр үтүө суобастаахтык үлэлээбит дьон.
Хатаска уопсастыбаннай үлэҕэ бэйэлэрин кылааттарын киллэрсибиттэр – эмиэ кинилэр. Бу көлүөнэ дьоҥҥо Кыайыы күнэ диэн өйдөбүл олорор олохторун биир саамай сырдык сыдьаайдаах, кэрэттэн кэрэ, өйгө-санааҕа иҥмит, этэргэ дылы, сибэтиэй күн буолар. Сыл аайы, Кыайыы күнэ кинилэргэ үбүлүөй курдук күндү эбит буоллаҕына, быйыл Кыайыы 75 сыла төһөлөөх күүтүүлээх буолбута буолуой?!
Бу көлүөнэни тобуктаппыт, саннын баттаабыт бу орто дойду олоҕор туох да суох. Олохпут оҥкулун тосту уларыппыт, алтыһыыттан матарбыт, көрсүһүүбүтүн көһөрбүт дьаҥ-дьаһах моһолун содулуттан дьон-сэргэ махталлаах ытыһын тыаһын истибэтэллэр даҕаны, кинилэр бу үөрүүнү сүһүөхтэрин үрдүгэр туран көрүстүлэр.
Ытык кыдьаҕастарбыт «Нэһилиэк бочуоттаах олохтооҕо» ааты ылбыттарынан нэһилиэк дьаһалтатын баһылыга Пермяков Евгений Петрович тус эҕэрдэтин, эстрада артыыһа, СӨ култууратын туйгуна Василий Сорокин- Айгылаан ырыатын тэлэбиисэргэ, социальнай ситимнэргэ иһиттилэр.
Этэҥҥэ буолуҥ, ытыктабыллаах ытык кырдьаҕастарбыт.
«Саха сирэ», edersaas.ru сайтка анаан Наталья РУФОВА