Биэнсийэ пуондатын Саха сиринээҕи салаата 2021 сылга судаарыстыбаннай өҥөлөрү сайабылыанньата суох биэрэр үлэтин салҕаабыта. Билигин Ийэ хапытаалын сэртипикээтин, саҥа төрөөбүт оҕолорго СНИЛС-ы биэрии, инбэлииттэргэ ыйдааҕы харчынан төлөбүрү уонна биэнсийэни саҥа анааһын сайабылыанньата суох бэриллэр. Тустаах тэрилтэлэр, биэдэмистибэлэр бэйэлэрэ алтыһан, наадалаах докумуоннары, сибидиэнньэлэри хомуйан, оҥороллор.
Судаарыстыбаннай өҥөлөрүн оҥоруу хаачыстыбатын «Ваш контроль» электроннай систиэмэ көмөтүнэн сыаналыахха сөп. Өҥөнү оҥоруу хаачыстыбатын сыаналыырга кэккэ киритиэрийдэр бааллар. Онно өҥө оҥоһуллар миэстэтин, бириэмэтин, исписэлиис үлэлиир хаачыстыбатын, эйэҕэһин, төһө өйдөнөр курдук быһаарбытын, о.д.а. сыаналыахха сөп.
Биэнсийэ пуондатын Саха сиринээҕи салаатын үлэтин, өҥөнү оҥоруу хаачыстыбатын 2021 сылга ортотунан 4,9 баалга сыаналаабыттар (муҥутуур улахан баал –5).
Ангелина Васильева, «Саха сирэ» хаһыат, edersaas.ru
Хаартыскаҕа: cras.ru