Судаарыстыбаннай хаһыат тэриллибитэ 100 сылыгар аналлаах улахан тэрээһин ыытыллар

Бүгүҥҥүттэн, ахсынньы 10-11 күннэригэр, киин куоракка  «Национальнай  тыллаах-өстөөх пресса аан дойду медиатыгар» диэн  аан дойду таһымнаах научнай кэмпириэнсийэ саҕаланар.

Бу тэрээһин судаарыстыбаннай хаһыат төрүттэммитэ 100 сылыгар анаан ыытыллар. Кэмпириэнсийэҕэ уонтан тахса хайысхалаах боппуруостарга  онлайн киэбинэн  сиэссийэлэр ыытыллыахтара. Арассыыйа, Великобритания, Казахстан¸Узбекистан, АХШ курдук дойдулар биллэр институттарын, хаһыаттарын исписэлиистэрэ анал дакылааттарынан кыттыахтара.

Итини тэҥэ,  тэрээһин чэрчитинэн, бүгүн 11 чаастан “Арассыыйа – мин устуоруйам”  өрөспүүбүлүкэтээҕи түмэлгэ  «Манчаары. Кыым. Саха сирэ – үйэлээх ситим”  диэн анал быыстапка  үөрүүлээх аһыллыыта буолуоҕа. Тэрээһиҥҥэ “Кыым” уонна “Саха сирэ” хаһыаттарга үлэлээбит ытык-мааны бэтэрээннэр кыттыыны ылыахтара.