Бэлиитикэ Маны аах

Судаарыстыбаннай Дуума дьокутааттарын талыы куоластааһынын онлайн кэтиэххэ сөп буолуоҕа

Саха сиригэр Арассыыйа Федеральнай мунньаҕын Судаарыстыбаннай Дуума дьокутааттарын талар учаастактарга онлайн уонна оффлайн эрэсиимҥэ видео-кэтэбил тэриллиэҕэ. Бу туһунан СӨ быыбардыыр кэмитиэт киинин куоластыыр бырааптаах чилиэнэ Екатерина Андреева иһитиннэрэр.

«1000-тан тахса куоластааччылаах бары учаастактарга онлайн-трансляция олохтонуоҕа. 277 учаастакка уопсайа куоластааччы 68%-на хабыллыаҕа. Ону тэҥэ, 35 талар хамыыһыйа үс күн устата онлайн көстүөҕэ. Онтон атыттарга оффлайн устуу тэриллиэҕэ», — диэтэ кини.

2021 сыл балаҕан ыйын 17,18 уонна 19 күннэригэр куоластааһыны Арассыыйа бары куораттарыгар тэриллибит Кэтиир кииннэр көрүөхтэрэ. Саха сиригэр куоластааһын хаамыытын Уопсастыбаннай видео-истиэнэҕэ, Курашов аатынан уулусса 24 №-дээх дьиэтигэр көрүөххэ сөп. Олохтоохтору уопсастыбаннай кэтээччи быһыытынан кыттыһарга ыҥыраллар.

Быыбар кэмигэр устууну тэрийии талар хамыыһыйа үлэтэ аһаҕастык, дьэҥкэтик ыытылларын туоһулуур.

Хаартыска — pnp.ru

0
0