Бүгүн VIII ыҥырыылаах Судаарыстыбаннай Дуума бастакы мунньаҕар бэрэссэдээтэлинэн “Биир ньыгыл Арассыыйа” баартыйаттан турбут Вячеслав Володин ананна.
Мунньахха бэрэссэдээтэл дуоһунаһыгар икки кандидат турбута. “Биир ньыгыл Арассыыйа” Вячеслав Володины, “КПРФ” баартыйа Дмитрий Новиковы туруорбута. Аһаҕас куоластааһын түмүгүнэн, Вячеслав Викторович туһатыгар 360 депутат куоластаата.
Вячеслав Володин бу иннинээҕи ыҥырыылаах Судаарыстыбаннай Дуума бэрэссэдээтэлинэн үлэлээбитэ. Ити иннинэ РФ бэрэсидьиэнин дьаһалтатын салайааччынан сылдьыбыта.
Күһүҥҥү быыбар түмүгүнэн, Судаарыстыбаннай Дуумаҕа “Биир ньыгыл Арассыыйаттан” Галина Данчикова, “КПРФ” баартыйаттан Петр Аммосов, “Сиэрдээх Арассыыйа-кырдьык туһугар” баартыйаттан Федот Тумусов депутаттарынан киирбиттэрэ. Ону сэргэ “Новые люди” баартыйаттан Сардаана Авксентьева, Забайкальеттан быыбарга кыттан Ил Түмэн депутатынан үлэлии сылдьыбыт Юрий Григорьев эмиэ Судаарыстыбаннай Дуума депутаттара буолбуттара.
Аграфена КУЗЬМИНА