Судаарыстыбаннай бириэмийэ — Офтальмология өрөспүүбүлүкэтээҕи балыыһатын кэлэктиибигэр
Доруобуйа харыстабылын салаатыгар П.А.Петров аатынан өрөспүүбүлүкэ судаарыстыбаннай бириэмийэтэ Офтальмология өрөспүүбүлүкэтээҕи килиниичэскэй балыыһатын быраастарыгар ананна.
edersaas.ru
Офтальмология быраастара үрдүк технологиялаах мэдиссиинискэй көмө саҥа көрүҥнэрин, кератопластиканы (харах дьэҥкир бүрүөтүн уларытыы) киллэрбиттэрин иһин наҕараадаланнылар.
Лауреат аата иҥэриллэр Судаарыстыбаннай бириэмийэ Офтальмология өрөспүүбүлүкэтээҕи килиниичэскэй балыыһатын кылаабынай бырааһа, мэдиссиинискэй наука хандьыдаата, доцент Иван Луцкаҥҥа, хирургия хайысхалаах офтальмология отделениетын сэбиэдиссэйэ, мэдиссиинискэй наука хандьыдаата Екатерина Захароваҕа, хирургия хайысхалаах отделение офтальмолог-быраастара Екатерина Басоваҕа, Иннокентий Белолюбскайга, Марина Максимоваҕа, анестезиолог, реаниматолог, хирургия хайысхалаах отделение офтальмолог-бырааһа Валерия Фоминаҕа, консультациялыыр-диагностикалыыр отделение офтальмологтара Ираида Винокуроваҕа, Аксинья Евсееваҕа, консультациялыыр-диагностикалыыр отделение оҕолору көрөр офтальмолог-быраастара Анна Михайловоҕа уонна Пантелеймон Аргуновка бэрилиннэ.
FEMTO-лазер көмөтүнэн харах дьэҥкир бүрүөтүн уларытарга үрдүк технологиялаах эпэрээссийэ аан бастаан 2021 сыл балаҕан ыйыгар оҥоһуллубута.
Саха сирин кырдьаҕас олохтооҕо хараҕын бүрүөтүн Москваҕа уларытыахтаах этиэ. Ол гынан баран, пандемиянын сибээстээн, эпэрээссийэтин хас да ый күүтэргэ күһэллибитэ. Ол иһин, Дьокуускайга эпэрээссийэлэнии кини көрөр буоларыгар бүтэһик эрэлинэн буолбута. Бу эпэрээссийэҕэ хирургия быһаҕын оннугар чопчу тэҥник хайа быһар лазер туһаныллыбыта. Ону таһынан Саха сирин офтальмологтара төрүөхтэриттэн катаракталаах кырачаан оҕолорго курустаалы уларытарга үрдүк технологиялаах эпэрээссийэлэри аан бастаан оҥорбуттара. Офтальмология өрөспүүбүлүкэтээҕи килиниичэскжй балыыһатын быраастарын үрдүк таһымнарын уонна тиэхиньиичэскэй сэбилэнии көмөтүнэн оҕолорго эпэрээссийэлэр Дьокуускайга оҥоһуллаллар. Онон кинилэр төрөппүттэрин кытары өрөспүүбүлүкэ таһыгар бара сатаабаттар.
Үрдүк технологиялаах табыгастаах көмөнү оҥорорго усулуобуйаны тэрийии -– Саха сирин Ил Дархана Айсен Николаев уонна өрөспүүбүлүкэ бырабыыталыстыбатын дьоһун суолталаах үлэлэриттэн биирдэстэрэ.
Надежда ЕГОРОВА, «Саха сирэ», edersaas.ru