Сандал саас кэлэн, хаар ууллан, кыһын устата мунньуллубут кир-хох, сыыс тахсан кэллэ. Маны үмүрү тутан ыраастыырга нэһилиэнньэ кытыннаҕына эрэ сатанар курдук. Ол чэрчитинэн, Дьокуускай куоракка итиннэ аналлаах үс ыйдаах субуотунньуктар саҕаланан, салайар хампаанньалар, олорор дьиэ табаарыстыбалара, тэрилтэлэр кэлэктииптэрэ, ыччат түмсүүлэрэ уонна уопсастыбаннай хамсааһыннар көхтөөхтүк кыттан эрэллэр.
Александр ТАРАСОВ, «Саха сирэ» хаһыат, https://edersaas.ru
Субуотунньуктары салайар хампаанньалар (УК) уонна олорор дьиэ табаарыстыбалара сыһыарыллыбыт сирдэринэн-уоттарынан иилээн-саҕалаан тэрийиэхтэрэ. Оттон тэрилтэ кэлэктииптэрэ, уопсастыбаннай түмсүүлэр ыраастыахтаах сирдэрин-уоттарын куорат уокуруктарын управлениелара быһаараллар.
Савва Михайлов, «Бүлүү кэскилэ» уопсастыбаннай түмсүү салайааччытын солбуйааччы:
– Көҕөрдүү үлэтэ, сааскы ыраастаныы саамай сөптөөх үлэ буолар. Тыа сириттэн төрүттээх буолан бэркэ билэбит, мантан инньэ сыыс уматыыта, тэлгэһэни хомуйуу саҕаланыаҕа. Бүлүүттэн төрүттээх Дьокуускай куоракка олорор дьон Чиряев уулуссатын уонна скверын ыраастыыбыт, хомуйа сылдьабыт. Ол курдук, бу үтүө холобуру ылынан, субуотунньуктарга көхтөөхтүк кыттан, Дьокуускайбытын, нэһилиэктэрбитин ыраастыахха, чэбдиктик тутуохха диэн ыҥырабын. Холобур, былырыын «Азия оҕолоро» оонньуу кэмигэр казахтары арыаллаабытым. Куораккыт ыраас диэн барбыттара.
