Сомоҕолоһуу күнүнэн Үөһээ Бүлүү улууһун Мэйик дьоно-сэргэтэ баһылык Михаил Макарович Хаччагаев тэрийиитинэн, Үөһээ Бүлүү сэлиэнньэтин баһылыгын сүбэһитэ Георгий Алексеевич Степанов көҕүлээһининэн, Олоҥхо ыһыаҕар анаммыт сирбитигэр-уоппутугар субуотунньуктаатылар.
Манна улууска олорор мэйиктэр уонна нэһилиэкпит дьоно-сэргэтэ кытыннылар. Бары Сэбиэскэй кэмҥэ улааппыт, комсомол ииппит оҕолоро үлэни, үөрэҕи өрө тутан баччааҥҥа диэри араас хайысханан үлэ үөһүгэр сылдьар биир дойдулаахтарбыт буолаллар. Кинилэр ортолоругар бааллар биһиги нэһилиэк өрүү инники күөҥҥэ сылдьар, киэн туттар тумус дьоммут: Георгий Алексеевич Степанов, Раиса Афанасьевна Стручкова, Тамара Афанасьевна Данилова, Марфа Николаевна Бускарова, Лилия Мартовна Яковлева, кэргэннии Туйаара, Николай Уйгуровтар, бырааттыы Сергей, Вячеслав Петровтар, Март, Петр Ксенофонтовтар, Константин Александров, Александр Федотов, Иван Яковлев, Данил Николаев, Афанасий Спиридонов Вячеслав Федотов, Виктор Хаччагаев, уо.д.а. Субуотунньук кыттыылаахтара мутук ыраастаабыттар, саһаан туруорбуттар. Манна балаҕан тутуллуохтаах, истиин-тастыын киэргэтиллиэхтээх, сирэ-уота тупсарыллыахтаах. Онон саныахха олус үчүгэй, долгутуулаах.
Ити курдук, дойдулаахтарбыт сирдэрин-уоттарын өрө тардар туһугар ыытыллар үлэҕэ-хамнаска кыттыбыттарыттан улаханнык үөрбүттэр, сүргэлэрэ көтөҕүллүбүт. Биһиги кинилэргэ махтал маанытын тиэрдэбит.
Валентина Попова,
Мэйик, Үөһээ Бүлүү.