Бе-200 Уус Алдан уонна Сунтаар улуустарыгар көтүөҕэ. Ойуур баһаардарын субуокката

Саха сиригэр 14 оройуоҥҥа турбут 24 баһаары умуллараллар, итинтэн тоҕуһа бохсулунна. Бе-200 амфибия-сөмөлүөт от ыйын 30 күнүгэр Хаҥалас оройуонугар көппүтэ, салгыы Уус Алдаҥҥа уонна Сунтаарга үлэлиирэ күүтүллэр. Баһаартан ураты режим 14 оройуоҥҥа олохтонно, өссө аҕыс муниципалитекка маннык режими киллэрэргэ эттилэр, диэн СИА-ҕа өрөспүүбүлүкэ Ил Дарханын уонна Бырабыыталыстыбатын пресс-сулууспата иһитиннэрдэ.

Баһаар турар кутталлаах кэмэ саҕаланыаҕыттан уопсайа 2 529,5 тыһыынча гектар иэннээх сиргэ 1070 (былырыын бу кэмҥэ 549 баһаар) ойуур баһаара бэлиэтэммитэ.
Хонтуруолланар зонаҕа 115 ойуур баһаара турда.

1402,5 гектарга ойуур 24 баһаарын умулларыыга үлэ ыытыллар. Ол курдук, 14 тэриллиигэ – Дьааҥы, Бүлүү, Горнай, Ленскэй (2), Мэҥэ Хаҥалас, Эдьигээн, Нам, Нерюнгри, Ньурба (4), Өлүөхүмэ, Сунтаар (4), Уус Алдан (2), Хаҥалас (3) оройуоннарыгар уонна Дьокуускай сиригэр-уотугар.

Итилэртэн уопсайа 243,5 гектарга 9 сиргэ турбут уот бохсулунна: Эдьигээн, Ленскэй (2), Нам, Ньурба, Өлүөхүмэ, Хаҥалас (2), Дьокуускай куорат.

788 киһи (парашютнай-десантнай баһаар сулууспата — 332 үлэһит, 273 олохтоох нэһилиэнньэ –273 киһи, ойуур үлэһитэ —19, баһаар-химическэй ыстаансыйа үлэһитэ — 151, ЫБММ үлэһитэ – 13) уоту умулларыыга куйааһы, буруону аахсыбакка үлэлиир. Маны сэргэ 85 тиэхиньикэни туһаналлар.

Олохтоохтор Саха сиригэр Хабаровскайтан кэлбит Бе-200 сөмөлүөккэ улаханнык эрэнэллэр. Бу көтөр аал Хаҥалас оройуонугар 110 туонна ууну “10-А” баһаарга сүөкээтэ. Салгыы сөмөлүөт кыаҕын Уус Алдаҥҥа уонна Сунтаарга туһаныахтара.

Баһаартан үрдүк кылаастаах куттал үөскээбитинэн өссө аҕыс оройуоҥҥа баһаары утары ураты режими олохтуурга этилиннэ. Ол курдук, Үөһээ Бүлүү, Кэбээйи, Мэҥэ Хаҥалас, Мииринэй, Нам, Өлүөхүмэ, Таатта, Уус Маайа оройуоннарыгар. Күөх тыабытын харыстыаҕыҥ!

СИА.