Саҥа үүммүт сылы хоту улуустар олохтоохторо үтүө сонуннаах көрүстүбүт. Ол курдук, дьэ, өр кэтэспит ыра санаабыт туолан, субсидиялаах көтөр буоллубут. Кырдьык, үтүө сонун!
Бу сылларга төһөлөөх ымсыырар этибитий, Москваҕа уонна атын куораттарга субсидиялаах билиэтинэн көтөллөрүн истэ-истэ. Бу уһун өрөбүллэригэр дойдуларыгар сынньана кэлбит оҕолор чэпчэтиилээх билиэт атыыласпыттарын иһиттибит. Ийэлиин-аҕалыын үөрүү диэтэҕиҥ. Спортсменнар даҕаны улуустартан Дьокуускайга көтүө, оҕолор араас олимпиадаларга, күрэхтэһиилэргэ кыттыа этилэр.
Былыр даҕаны, билигин даҕаны кэлии-барыы суох буоллаҕына, сайдыы барбатын бэркэ билэбит. Киин сиргэ баран быраастарга көрдөрөн, эмтэнэн кэллэххэ да бэрт дии. Туох кистэлэ кэлиэй, урут көтүү сыаната ыараханыттан кыайан кэмигэр көрдөрүммэккэ, ыарыытын баалаппыт да элбэх.
Онон Ил Дархаммытыгар Айсен Николаевка, бырабыыталыстыбаҕа махтанабыт.
Д.СЛЕПЦОВА.
Хаартыска ysia.ru архыыбыттан ылылынна