Социальнай ситимнэргэ дьон субсидияламмыт чэпчэки сыаналаах билиэккэ тиксибэккэ кыһыыларын таһааран: «Улуу Москуба куораты тэлэбиисэринэн эрэ көрөбүт оттон Европа дойдуларын икки ардыгар баара-суоҕа 1500 солк., хайа талбыт куораккар көтүөххүн сөп», — диэн суруйар буоллулар.
Москубаҕа уонна да атын киин куораттарга көтүү хаһан баҕарар Сахабыт сирин олохтоохторугар улахан кыһалҕа буолар. Сайын уоппуска кэмигэр атырдьах ыйыгар билиэт сыаната ол хайысханан бара-кэлэ 80 – 90 000 солк. тиийэр. Дьиэ кэргэнинэн көтөөрү гыннахха, икки оҕолоох ыалга ортотунан аҥаардас Москубаҕа диэри айаҥҥа 300 000 солк. наада. Боростуой үлэһит уоппускатын харчыта ити суумаҕа эппиэттэспэт. Онон, үлэҕэр айаныҥ ороскуотун төлөөбөт түгэннэригэр, дьиэҕиттэн ырааппаккын. Сахабыт сирин улуустарыгар, ордук хоту көтөргө билиэт Москуба киэниттэн сыаната эмиэ хаалсыбат.
Бу сытыы боппуруоһу Ил Дархан Владивосток куоракка Уһук Илин эрэгийиэни сайыннарыыга анаммыт сүбэ мунньахха туруорсубута. Егор Борисов субсидияламмыт билиэттэри үбүлүүргэ кэккэ кыһалҕа баарын, ону таһынан, чэпчэтиинэн туһанар нэһилиэнньэ араҥатын кэҥэтэргэ, элбэх оҕолоох ийэлэри киллэрэр наадалааҕын эппитэ.
Субсидиялаах билиэтинэн туһаныыга инникитин РФ Бырабыыталыстыбата өссө элбэх оҕолоох ыаллары киллэрэр туһунан былаанныыр. Ол эрэн, сайын ортото — күһүөрү дьон саамай соҕуруу сынньана барар кэмнэригэр чэпчэтиллибит билиэт суох буолан моһуоктуур.
Уһук Илинтэн дойду киин куораттарыгар субсидияламмыт билиэтинэн көтөргө уонна соҕуруу Хара муора кытылыгар сынньана барарга бу күннэргэ РФ бырабыыталыстыбата миллиард аҥаара үбү эбии көрдө. Ити туһунан Уһук Илини сайыннарыы миниистирэ Александр Галушка иһитиннэрдэ.
Салгын суолунан дьону таһарга чэпчэтиллибит сыананан 7 авиахампаанньа үлэлиэҕэ: «Аэрофлот — Российские авиалинии», «АЛРОСА», «Норд Стар», «S7», «Уральские авиалинии», «ЮТэйр» уонна «Якутия».
Росавиация этэринэн, 2018 сылга 57 хайысханан 446,7 тыһыынча киһи чэпчэтиллибит билиэтинэн туһанар кыахтаныахтара, ол иһигэр оҕолор «Океан» лааҕырга сынньана, доруобуйаларын бөҕөргөтүнэ барыахтара.
Марианна ТЫРТЫКОВА, «Саха сирэ», edersaas.ru