Бүгүн, олунньу 5 күнүгэр, СӨ Тыа хаһаайыстыбатын миниистирин бастакы солбуйааччы Татьяна Осипова «Тэтим» араадьыйанан ыйытыыларга хоруйдары биэрдэ.
edersaas.ru
Миниистири солбуйааччы ыанар ынах төбөтүгэр көрүллэр 35 тыһыынча солкуобайдаах субсидия отчуота судургу буолла диэн эттэ:
—Бу күннэргэ нолуок тэрилтэтин, үп уонна экэниэмикэ министиэристибэлэрин кытары элбэх ырытыы мунньах ыытылынна. Ол түмүгэр, нэһилиэнньэ санаатын ылынан, субсидия отчуотун судургу оҥордубут. Субсидияны ылбыт тус көмө хаһаайыстыбалаах дьон чиэк, квитанция хомуйсубакка, сөбүлэҥ түһэрсибэккэ, улуус тыатын хаһаайыстыбатын тэрилтэтигэр сыл түмүгэр «2021 сыл түмүгүнэн, ыанар ынаҕым төбөтүн хааллардым» диэн тустаах докумуону эрэ туттарара ирдэнэр. Ол аата, сыл саҥатыгар реестргэ киирбит төбө ахсаана, сыл түмүгэр отчуокка баар буолуохтаах, – диэн Татьяна Матвеевна кэпсээтэ.